کراچیاورنگی ٹاؤن سے 33 افراد کا قاتل منا عرف چنگاری گرفتار

ملزم کے دیگر ساتھیوں کی گرفتاری کے لئے بھی چھاپے مارے جا رہے ہیں،پولیس:فوٹو:فائل

---

سی آئی ڈی پولیس نے کراچی کے علاقے اورنگی ٹاؤن سے 33 افراد کے قتل میں ملوث ملزم منا عرف چنگاری کو گرفتار کرلیا ۔

ایکسپریس نیوز کے مطابق سی آئی ڈی پولیس کےانسپکٹر فیاض خان نے دعویٰ کیا ہے کہ سی آئی ڈی نے اورنگی ٹاؤن کےعلاقے میں کارروائی کرکے اہم ملزم امین عرف منا چنگاری کو گرفتار کیا ہے اورملزم کا تعلق کالعدم لشکر جھنگوی کے حافظ قاسم گروپ سے ہے۔

پولیس کے مطابق ملزم نے تفتیش کے دوران 12 پولیس اہلکاروں سمیت 33 افراد کے قتل کا اعتراف کیا جبکہ ملزم سے تین راکٹ، بیس کلو بارودی مواد، فیوز، پسٹل اور دیگر اشیا برآمد ہوئی ہیں۔انسپکٹرفیاض خان نے بتایا کہ ملزم امین گرفتاری سے بچنے کیلئے ہر ہفتے اپنی جگہ تبدیل کرتا رہتا تھا اور اب ملزم کے دیگر ساتھیوں کی گرفتاری کے لئے بھی چھاپے مارے جا رہے ہیں۔