مصباح الحق کو ٹی 20 میں نہیں کھلا سکتے معین خان

کوشش ہوگی کہ دستیاب کھلاڑی اس دورے میں اچھی پرفارمنس دیں، معین خان۔ فوٹو: فائل

---

SUKKUR: پاکستان کرکٹ ٹیم کے مینجرمعین خان نے کہا ہے کہ شعیب ملک اور عبدالرزاق کی جگہ مصباح الحق کو ٹی 20میچز میں نہیں کھلا سکتے۔

جوہانسبرگ سے ایکسپریس نیوز سے بات کرتے ہوئے قومی ٹیم کے منیجرمعین خان کا کہنا تھا کہ مصباح الحق ٹیم کےساتھ نہیں ہیں، وہ ون ڈے ٹیم کا حصہ ہیں، انہیں کسی کھلاڑی کی جگہ ٹی 20میچز میں کیسے کھلا سکتے ہیں، کرکٹ بورڈ کی جانب سے بھی ایسی کوئی ہدایت نہیں ملی ہے۔ معین خان کا کہنا تھا کہ محمدعرفان کے بعد شعیب ملک اور عبدالرزاق کا ان فٹ ہونا ٹیم کےلیے بہت بڑا دھچکہ ہے، کھلاڑی اچھی پرفارمنس کےلیےسخت محنت کررہے ہیں، کوشش ہوگی کہ دستیاب کھلاڑی اس دورے میں اچھی پرفارمنس دیں۔

واضح رہے کہ دورہ جنوبی افریقا کے لئے قومی ٹیم میں شامل آل راؤنڈرز عبدالرزاق اور شعیب ملک کے ان فٹ ہونے کے بعد پاکستان کرکٹ بورڈ نے تاحال متبادل کھلاڑیوں کا اعلان نہیں کیا ہے۔