ایران کے حملے میں دماغی چوٹ سے متاثر امریکی اہلکاروں کی تعداد 109 ہوگئی پینٹاگون

پینٹاگون کا کہنا ہے کہ عراق کے امریکی فوجی اڈے پر ایرانی میزائل حملے میں دماغی چوٹوں سے متاثر ہونے والے اہلکاروں کی تعداد 64 سے بڑھ کر 109 ہو گئی ہے۔

امریکی وزارت دفاع کے صدر دفتر پینٹاگون کے ترجمان لیفٹیننٹ کرنل تھامس کیمپبیل نے اپنے حالیہ بیان میں اعتراف کیا ہے کہ گزشتہ ماہ کے آغاز میں عراق کے عین الاسد فوجی اڈے پر ایران کے میزائل حملوں سے متاثر ہونے والے امریکی فوجیوں کی تعداد 64 سے بڑھ کر 109 ہوگئی ہے۔

یہ خبر پڑھیں : عراق میں امریکی فوجی اڈوں پر حملہ تو محض ایک 'وارننگ' تھی، ایران

ترجمان کا مزید کہنا تھا کہ ان اہلکاروں کو شدید دماغی چوٹیں آئی ہیں اور وہ سر درد، چکر آنا، متلی ہونا اور روشنی سے حساسیت کا شکار ہوگئے ہیں۔ جن میں سے اکثر کا علاج ہوچکا ہے تاہم کئی نئے مریض بھی سامنے آئے ہیں۔ 109 میں 76 کو علاج کے بعد واپس ملازمتوں پر بھیج دیا گیا ہے۔


یہ خبر بھی پڑھیں : امریکی فوجی اڈوں پرحملوں میں 80 افراد ہلاک ہوئے، ایران کا دعوی

لیفٹیننٹ کرنل تھامس کیمپبیل نے بتایا کہ 18 امریکی فوجیوں کو علاج کے لیے جرمنی اور ایک کو کویت بھی بھیجا گیا جب کہ 31 اہلکاروں کا علاج عراق میں ہوا اور وہ ڈیوٹی پر واپس آگئے ہیں۔

یہ خبر پڑھیں : امریکی اڈوں پر ایران کے میزائل حملوں میں 11 فوجی زخمی ہوئے، امریکا

واضح رہے کہ 8 جنوری کو صدر ڈونلڈ ٹرمپ نے ایرانی حملے پر پالیسی بیان میں امریکی فوجیوں کے زخمی یا ہلاک ہونے کی تردید کی تھی تاہم بعد میں پینٹاگون نے 31 اہلکاروں کے زخمی ہونے کا اعتراف کرلیا تھا اس کے بعد یہ تعداد 50 بتائی گئی تھی، بعد ازاں کہا گیا کہ تعداد 64 ہے اور اب ایک بار پھر تعداد میں اضافہ بتایا گیا ہے۔