صدرعارف علوی کی رجب اردوان کو نماز جمعہ کی امامت کی دعوت

ترک صدر نے نہایت عاجزی کا مظاہرہ کرتے ہوئے امام صاحب سے امامت کرنے کا کہا

ویب ڈیسک February 15, 2020

ترک صدر نے نہایت عاجزی کا مظاہرہ کرتے ہوئے امام صاحب سے امامت کرنے کا کہا فوٹوانٹرنیٹ

صدر مملکت عارف علوی نے ترک صدر رجب طیب اردوان کو جمعے کی نماز کی امامت کرنے کی دعوت دی جب کہ امام صاحب نے بھی رجب طیب اردوان سے یہی بات کہی۔

ترک صدر رجب طیب اردوان دو روزہ دورے پر پاکستان میں موجود تھے۔ اپنے دورے کے دوران انہوں نے گزشتہ روز پارلیمنٹ کے مشترکہ اجلاس سے خطاب کیا بعد ازاں ایوان صدر میں نماز جمعہ کی ادائیگی بھی کی۔ اس موقع پر کئی دلچسپ مناظر دیکھنے میں آئے۔

یہ بھی پڑھیں: خدا ترکی اورپاکستان کو آباد رکھے

ترکی اردو نامی ٹوئٹر ہینڈل سے ترک صدر کی ایوان صدر میں نماز جمعہ کی ادائیگی کی ویڈیو شیئر کی گئی ہے جس میں نماز سے قبل صدر عارف علوی رجب طیب اردوان کو نماز جمعہ کی امامت کی دعوت دے رہے ہیں جب کہ امام صاحب نے بھی ترک صدر سے کہا کہ آپ کا امامت کرنا دنیا و آخرت میں ہمارے لیے باعث سعادت ہوگا۔

یہ بھی پڑھیں: کشمیر ہمارے لیے وہی حیثیت رکھتا ہے جو پاکستان کے لیے ہے، ترک صدر

تاہم ترک صدر نے نہایت عاجزی کا مظاہرہ کرتے ہوئے امام صاحب سے امامت کرنے کا کہا۔ نماز جمعہ کی ادائیگی کے موقع پر دیکھا جاسکتا ہے کہ پہلی صف میں ترک صدر رجب طیب اردوان ان کے برابر میں صدر عارف علوی اور پی ٹی آئی رہنما فیصل جاوید نماز ادا کررہے ہیں۔

آج ایوان صدر میں نماز جمعہ کی ادائیگی کے موقع پر دلچسپ مناظر
صدر رجب طیب ایردوان کو پاکستان کے صدر ڈاکٹر عارف علوی نے نماز کی امامت کی دعوت دی جبکہ امام صاحب نے کہا کہ آپ کا امامت کرنا دنیا و آخرت میں ہمارے لیے باعث سعادت ہوگا۔ pic.twitter.com/y7YYaFj37d
— ترکیہ اردو (@TurkiyeUrdu_) February 14, 2020