نوابشاہ کار ٹریکٹر ٹرالی سے ٹکرا گئی میاں بیوی سمیت3افراد جاں بحق

2بچے اور خاتون شدید زخمی، حادثہ مہران ہائی وے پر اندھیرے کے باعث پیش آیا، متاثرہ خاندان رشتے دارکی تدفین میں جارہاتھا۔ فوٹو: فائل

---

نواب شاہ باندھی شوگر ملز کے قریب المناک حادثہ، تیز رفتار کار گنے سے بھری ٹریکٹر ٹرالی سے ٹکرا گئی، کار میں سوار میاں بیوی سمیت 3 افراد جاں بحق،2 بچوں سمیت 3 شدید زخمی ہوگئے، حادثے کا شکار افراد قریبی رشتے دار کی تدفین میں شرکت کیلیے جارہے تھے۔

تفصیلات کے مطابق گزشتہ شب باندھی شوگر ملز کے قریب مہران ہائی وے پر بھریاروڈ سے میرپورخاص جانے والی ٹیکسی سامنے گنے سے بھری ہوئی ٹرالی سے ٹکراگئی جس کے نتیجے میں کار میں سوار 30 سالہ ساجد علی مہر اور اس کی بیوی 26 سالہ فوزیہ اور 12 سالہ بھتیجا عدیل موقع پر ہی جاں بحق ہوگئے۔



جبکہ ایک خاتون سمیت 2 بچے 5 سالہ بلال اور 6 سالہ امان اللہ شدید زخمی ہوگئے جنھیں پیپلز میڈیکل کالج اسپتال نواب شاہ میں داخل کرایا گیا ۔ حادثہ اندھیرے کے باعث ٹرالی نظر نہ آنے کی وجہ سے پیش آیا، بدقسمت خاندان میرپورخاص میں رشتے داروں میں میت کی تدفین میں شرکت کے لیے جارہا تھا۔