رینکنگ اسنوکر کپ محمد آصف سیمی فائنل میں پہنچ گئے

عالمی چیمپئن محمد آصف اپنے دونوں میچز جیت کر چوتھے قومی رینکنگ اسنوکر کپ کے سیمی فائنل میں پہنچ گئے۔

ان کا مقابلہ ہفتے کو سیکنڈ سیڈ عمران شہزاد سے ہوگا، دوسرے فائنلسٹ کا فیصلہ کرنے کیلیے محمد بلال اور بابر مسیح آمنے سامنے ہوں گے، مقابلے11 فریمز پر مشتمل ہوں گے، مقامی ہوٹل میں جاری ایونٹ کے لیگ رائونڈ کے آخری روز آصف نے ٹاپ سیڈ شاہد آفتاب کو 4-3سے شکست دیا،بعدازاں انھوں نے فرحان نورکو بھی کسی دقت کے بغیر 4-0 سے قابوکر کے فائنل فور تک رسائی کنفرم کرالی۔




عمران شہزاد نے اسجد اقبال کو4-1سے پسپا کیا لیکن آخری میچ میں عبدالستار نے انھیں4-0سے قابو کر لیا، محمد بلال نے ابو صائم کو4-2اور پھر سابق قومی چیمپئن خرم آغا کو4-0سے مات دے کر سیمی فائنل کھیلنے کا حق حاصل کیا،بابر مسیح نے سابقہ کارکردگی کے تسلسل کو برقرار رکھتے ہوئے عامر طارق کو4-0 سے قابو کیا، وہ اپنے آخری میچ میںسیڈ12شرجیل محمود کے ہاتھوں 4-3سے شکست کھا بیٹھے،اس طرح آصف اور عمران شہزاد نے فائنل فور میں جگہ بنائی لیکن قومی ٹیم کے دیگر2کیوئسٹ ٹاپ سیڈ شاہد آفتاب اور سیڈ4محمد سجاد ایونٹ سے باہر ہوگئے۔