پیپ کے انتخابات گرین پینل کے تمام امیدوار بھاری اکثریت سے کامیاب

پاکستان ایسوسی ایشن آف پریس فوٹوگرافرز کے نومنتخب عہدیداران و مجلس عاملہ کے اراکین کا کے یو جے کے صدر جی ایم جمالی اور پی ایف یو جے کے سیکریٹری جنرل امین یوسف کے ہمراہ گروپ۔ فوٹو: ایکسپریس

---

پاکستان ایسوسی ایشن آف پریس فوٹوگرافرز کے انتخابات برائے2014 میں گرین پینل نے تمام نشستوں پر بھاری اکثریت کے ساتھ کامیابی حاصل کرلی۔

ہفتہ کوپریس کلب میں منعقد ہونے والے انتخابات کی پولنگ دوپہر ایک بجے سے شام 5بجے تک بغیر وقفے کے جاری رہی، الیکشن کمیشن کے جاری نتائج کے مطابق صدر کے عہدے پر شعیب احمد ، نائب صدر کے عہدے پر سعید اقبال ، سیکریٹری کے عہدے پر اطہرخان، جوائنٹ سیکریٹری کے عہدے پر فرید خان جبکہ خزانچی کے عہدے پر حامدحسین کامیاب ہوئے ہیں ، الیکشن کمیشن کے مطابق مجلس عاملہ کی نشستوں پر افتخاراحمد، اشرف میمن، آصف راٹھور، مسرورعابدی اور جاویداقبال منتخب ہوئے ہیں جبکہ ٹرسٹی کے عہدوں پر محمد جمیل، اطہرحسین، مظہراحمد، راشد اجمیری، مجید حسین اور سعید قریشی پہلے ہی بلامقابلہ منتخب ہوچکے ہیں۔



گرین پینل کی کامیابی پر پاکستان فیڈرل یونین آف جرنلسٹس کے صدر رانا عظیم ، سیکریٹری جنرل امین یوسف ، کراچی یونین آف جرنلسٹس کے صدر جی ایم جمالی ، جنرل سیکریٹری واجد رضا اصفہانی نے مبارک باد پیش کی ہے اور کہا ہے کہ پیپ کے نومنتخب عہدیداران فوٹوگرافرز کے مسائل کے حل کے لیے اپنا بھرپور کردار ادا کریںگے ، دریں اثناپیپلزپارٹی کے رہنما اور سابق وزیر بلدیات اویس مظفر نے بھی پیپ کے انتخابات میں کامیابی حاصل کرنے والے تمام عہدیداروں کو مبارک باد پیش کرتے ہوئے امید ظاہر کی ہے کہ نو منتخب عہدیدار اپنی تمام تر صلاحیتوں کو بروئے کار لاتے ہوئے فوٹو گرافرز کے مسائل کے حل کریں گے۔