سکرنڈ کے قریب ٹریفک کا المناک حادثہ ایک ہی خاندان کے5افراد جاں بحق

کوچ کی رفتار اتنی زیادہ تھی کہ اس نے کار کو کچل دیا جس کے نتیجے میں کار میں سوار 5 افراد موقع پر جاں بحق ہوگئے۔ فوٹو: فائل

---

لاہور: سکرنڈ کے قریب قومی شاہراہ پر المناک حادثہ، ایک ہی خاندان کے 5 افراد جاں بحق ہوگئے، ایک شدید زخمی۔

حادثے کا شکار افراد مورو سے حیدرآباد جارہے تھے،کار اوور ٹیک کرتے ہوئے سامنے سے آتی تیز رفتار مسافر کوچ کی زد میں آکر کچلی گئی۔ کوچ ڈرائیور کو پولیس نے گرفتار کرلیا، جاں بحق ہونے والوں میں 3 خواتین اور ایک بچی بھی شامل ہے۔ تفصیلات کے مطابق پیر کی صبح سکرنڈ کے قریب قومی شاہراہ پر مورو سے حیدرآباد جانے والی کار اوورٹیک کرتے ہوئے سامنے سے آنے والی تیز رفتار مسافر کوچ سے ٹکرا گئی۔



کوچ کی رفتار اتنی زیادہ تھی کہ اس نے کار کو کچل دیا جس کے نتیجے میں کار میں سوار 5 افراد موقع پر جاں بحق جبکہ ایک شدید زخمی ہوگیا۔ جاں بحق ہونے والوں میں 3 خواتین اور ایک بچی بھی شامل ہے۔ کار کے دروازے کاٹ کا لاشیں نکالی گئیں۔ شدید زخمی نوجوان دانیال کو پیپلز میڈیکل کالج اسپتال نواب شاہ لے جایا گیا۔

جہاں اس کی حالت بہتر بتائی جاتی ہے۔ حادثے کی اطلاع پر سکرنڈ اور موٹروے پولیس فوری طور جائے وقوع پہنچ گئی اور کوچ کے ڈرائیور کو حراست میں لے لیا۔ حادثے میں جاں بحق ہونے والوں میں الطاف میمن اور روزبینہ میاں بیوی تھے جبکہ شبانہ الطاف میمن کی بھابھی اور 12 سالہ امید بھتیجی اور حمید سالی تھی۔ حادثے کا شکار افراد کا تعلق مورو سے تھا۔