نیپال میں ایک دوسرے کو بچانے کی کوشش میں 13 بندر ڈوب کر ہلاک

مجموعی طور پر 13 بندر تالاب میں گر کر ہلاک ہوئے، فوٹو : فائل

---

نیپال میں ایک بندر کے تالاب میں گر جانے کے بعد اسے بچانے کی کوشش میں یکے بعد دیگرے جانے والے 12 بندر بھی ڈوب کر ہلاک ہوگئے۔

عالمی خبر رساں ادارے کے مطابق نیپال کے ایک گاؤں میں رات بھر ہونے والی بارشوں کے باعث تالاب کی سطح میں غیر معمولی اضافہ ہوگیا تھا اور اس دوران وہاں پانی پینے کی کوشش میں ایک بندر تالاب میں گر گیا جسے بچانے کے لیے یکے بعد دیگرے درجن سے زائد بندروں نے چھلانگیں لگائیں تاہم ایک دوسرے کو بچانے کی کوشش میں ایک بھی بندر باہر نکلنے میں کامیاب نہیں ہوسکا۔

گورکھا میونسپل ادارے نے امدادی کاموں کا آغاز کرتے ہوئے تالاب سے 13 جنگلی بندروں کی لاشیں نکالی ہیں۔ اس تالاب میں بندروں کے ڈوبنے کا 6 ماہ کے اندر یہ دوسرا بڑا واقعہ ہے اس سے قبل اسی تالاب میں ایک ہی وقت میں 16 بندر ڈوب کر ہلاک ہوگئے تھے۔

شہریوں نے مقامی انتظامیہ سے بندروں کی حفاظت کے لیے فوری طور پر ضروری اقدامات اُٹھانے کا مطالبہ کرتے ہوئے کہا کہ جانوروں کے تحفظ کے لیے خاطر خواہ انتظامات نہیں کیے گئے ہیں۔