راولپنڈی میں پی ایس ایل مقابلے ایک لاکھ سے زیادہ تماشائیوں نے اسٹیڈیم آکر میچز دیکھے

پنڈی کرکٹ اسٹیڈیم کے گراؤنڈ اسٹاف اصل ہیروز ہیں، چیف آپریٹنگ آفیسر پی سی بی فوٹو: فائل

---

پاکستان کرکٹ بورڈ نے دعوی کیاہے کہ راولپنڈی میں ایک لاکھ سے زیادہ تماشائیوں نے اسٹیڈیم آکر پی ایس یل کے میچز دیکھے۔

17 ہزار افراد کی گنجائش والے راولپنڈی کرکٹ اسٹیڈیم میں مجموعی طور پر پی ایس ایل 5 کے 8 میچز کھیلے گئِے جس میں شائقین کا جوش وخروش زبردست رہا۔ ایک لاکھ س زائد تماشائیوں نے اسٹیڈیم میں آکر میچز دیکھے، ملتان میں 3 میچز کو دیکھنے والوں کی تعداد 80 ہزار سے زیادہ رہی۔ کراچی میں ابتدائی میچوں میں شائقین کی آمد 90 فیصد جب کہ قذافی اسٹیڈیم میں اب تک 80 فی صد رہی ہے۔

پی سی بی کے چیف آپریٹنگ آفیسر سلمان نصیر کا کہنا ہے کہ کرکٹ پاکستانی عوام کا پسندیدہ کھیل ہے اور اس تناظر میں مداحوں کی اسٹیڈیم آمد پاکستان کرکٹ بورڈ کے لیے خوشی کا باعث ہے۔ شائقینِ کرکٹ کی اسٹیڈیم آمد سے جہاں کھلاڑیوں کی حوصلہ افزائی ہوتی ہے تو وہیں میڈیا کوریج کے ذریعے دنیا بھر میں پاکستان کی ثقافت اور روایات کا مثبت پہلو بھی اجاگر ہوتا ہے۔ لیگ کے دوران چند میچوں میں موسم کھیل کے لیے سازگار نہیں تھا تاہم اس کے باوجود کرکٹ کے مداحوں نے حوصلے اور صبر سے کام لیا۔

چیف آپریٹنگ آفیسر نےگراؤنڈ اسٹاف کو خراج تحسین پیش کرتے ہوئے کہا کہ لیگ میں شامل 6 ٹیموں اور میچ آفیشلز کے بعد گراؤنڈ اسٹاف اس ٹورنامنٹ کی آٹھویں ٹیم ہے۔ پنڈی کرکٹ اسٹیڈیم کے گراؤنڈ اسٹاف اصل ہیروز ہیں، ان کی انتھک محنت کے سبب بارش کے باوجود بھی لیگ کے میچز کا انعقاد ممکن بنایا جاسکا۔ قذافی اسٹیڈیم لاہور اور نیشنل اسٹیڈیم کراچی میں بھی اتنا ہی محنتی گراؤنڈ اسٹاف موجود ہے اور ایسے عملے کی موجودگی پی سی بی کی کامیابی کا بڑا سبب ہے۔ پی سی بی کی جانب سے مقامی انتظامیہ، صوبائی حکومتوں اور سیکورٹی ایجنسیوں کے تعاون پر ان کا شکریہ ادا کرتے ہیں۔ ان کےتعاون کے بغیرپی سی بی کے لیے اتنا بڑا ایونٹ منعقد کروانا ممکن نہ تھا۔