کورونا وائرسایران نے آئی ایم ایف سے 5 ارب ڈالر قرض مانگ لیا

جواد ظریف امریکی پابندیاں ختم کروانے ک لیے اقوام متحدہ کے سیکریٹری جنرل کو بھی خط لکھ چکے ہیں، ایرانی میڈیا۔ فوٹو، فائل

---

ایران نے کورونا وائرس سے مقابلے کے لیے آئی ایم ایف سے 5ارب ڈالر کا ہنگامی فنڈ طلب کرلیا۔

ایرانی وزیر خارجہ جواد ظریف نے ٹویٹر پر اپنے پیغام میں کہا ہے کہ آئی ایم ایف کی مینجنگ ڈائریکٹر کرسٹالینا جارجیوا نے کورونا وائرس کے مقابلے کے لیے ہنگامی مالیاتی معاونت کا اعلان کیا تھا، ایران کا مرکزی بینک فوری طور پر یہ سہولت حاصل کرنے کی درخواست کرتا ہے۔

انہوں نے کہا کہ آئی ایم ایف ذمے داری کا مظاہرہ کرتے ہوئے تاریخ کی درست سمت میں کھڑے ہونے کا فیصلہ کرے۔

IMF's @KGeorgieva has stated that countries affected by #COVID19 will be supported via Rapid Financial Instrument. Our Central Bank requested access to this facility immediately.

IMF/IMF Board should adhere to Fund's mandate, stand on right side of history & act responsibly.

— Javad Zarif (@JZarif) March 12, 2020

ایران کے مرکزی بینک کے سربراہ عبدالناصر ہمتی نے اپنے انسٹاگرام پیج پر بتایا ہے کہ کورونا وائرس سے مقابلے کے لیے آئی ایم ایف کی سربراہ کے نام ریپڈ فنانشل انسٹرومنٹ(آر ایف آئی) کے ذریعے پانچ ارب ڈالر کے ہنگامی فنڈ کی درخواست ارسال کردی گئی ہے۔

واضح رہے کہ مشرق وسطیٰ میں ایران کورونا وائرس سے سب سے زیادہ متاثر ہونے والا ملک ہے، اب تک وہاں مہلک وائرس سے 429 اموات ہوچکی ہیں جب کہ متاثرین کی تعداد 10ہزار سے تجاوز کرچکی ہے۔

گیس کی برآمدات سمیت امریکا کی جانب سے لگائی گئی دیگر پابندیوں کے باعث ایران کی معیشت پہلے ہی شدید مسائل سے دوچار ہے۔ ایرانی حکومت کورونا وائرس کے مقابلے میں درپیش مشکلات کے لیے امریکا کو مورد الزام ٹھہراتی ہے۔

ایرانی میڈیا کے مطابق وزیر خارجہ جواد ظریف نے اقوام متحدہ کے سیکریٹری جنرل انتنیو گوتیرس کو لکھے گئے خط میں بھی امریکی پابندیاں ہٹانے کا مطالبہ کیا ہے۔

دوسری جانب امریکی حکام کا کہنا ہے کہ ایران پر عائد پابندیاں ادویہ پر اثر انداز نہیں ہوتیں اور گزشتہ ماہ امریکی وزیر خارجہ مائیک پومپیو نے وائرس کے پھیلاؤ پر قابو پانے کے لیے ایران کو مدد کی پیش کش بھی کی تھی تاہم ایران نے امریکی پیش کش کو مضحکہ خیز قرار دے کر مسترد کردیا تھا۔