کورونا سے نجات کیلیے مختلف شہروں میں مساجد اور گھروں سے اذانیں بلند

علمائے کرام کی اپیل پر اجتماعی اذان اور دعاؤں کا اہتمام کیا گیا۔ فوٹو انٹر نیٹ

---

ملک کے مختلف شہروں میں کورونا وائرس کی وبا سے نجات کے لیے مساجد اور گھروں سے اجتماعی اذان اور خصوصی دعاؤں کا اہتمام کیا گیا۔

ایکسپریس نیوز کے مطابق پشاور کی تمام مساجد سے رات 10 بجے اجتماعی اذان دینے کا اعلان کیا گیا اور شہریوں سے با وضو ہو کر اپنےگھرکی چھتوں پر اذان دینے کی اپیل کی گئی۔

پتوکی ، بورےوالا، عارف والا اور گردونواح کے علاقوں میں لوگوں نے علمائے کرام کی اپیل پر گھروں کی چھتوں پر اذانیں دینا شروع کیں اور خصوصی دعاؤں کا اہتمام بھی کیا۔ علاوہ ازیں حیدرآباد، بدین، سامارو، ٹنڈوجام، جام صاحب میں بھی مساجد اور گھروں کی چھتوں پر اذانیں دی گئیں۔ ملک کے مختلف شہروں میں مقامی علما نے وبا سے نجات کے لیے مساجد اور گھروں کی چھت پر بیک وقت اذان دینے اور خصوصی دعاؤں کا اہتمام کرنے کی اپیل کی تھی۔