بھارت کرکٹ میں سیاست لانے کی روش پر برقرار

حکومت سے اجازت لیے بغیر پاکستان کے ساتھ نہیں کھیل سکتے،بورڈ

Sports Reporter April 17, 2020

کیس جیتنے اورویمنز چیمپئن شپ کے پوائنٹس برابرتقسیم ہونے پر مسرور۔ فوٹو: فائل

بھارت کرکٹ میں سیاست کو لانے کی روش پر برقرار ہے جب کہ باہمی سیریز سے انکاری بورڈ کی جانب سے جواز تراشی کا سلسلہ جاری رہا۔

پاکستان سے باہمی سیریز سے مسلسل انکار کرنے والے بھارتی بورڈ نے ایک بار پھر پرانا موقف دہراتے ہوئے کرکٹ میں سیاست کی سوچ پروان چڑھائی ہے، ایک غیر ملکی خبررساں ادارے سے گفتگو میں بی سی سی آئی کے عہدیدار نے کہا کہ حکومت کی اجازت کے بغیر پاکستان سے میچز نہیں کھیل سکتے، آئی سی سی کی تنازعات کے حل کیلیے قائم کی جانے والی کمیٹی نے بھی ہمارا موقف تسلیم کیا جس کی وجہ سے پی سی بی ہرجانہ وصولی کیس میں ناکام رہا۔

انہوں نے کہا کہ ہمارے وکلا نے کمیٹی کو بتایا کہ یہ صرف پاکستان کے ساتھ باہمی سیریز کی بات نہیں، بی سی سی آئی کو کسی بھی ایونٹ میں شرکت کیلیے حکومت کی اجازت درکار ہوتی ہے، کلیئرنس نہ ملے تو ہم کچھ نہیں کرسکتے،آئی سی سی نے ہمارا یہ موقف تسلیم کیا،اب بھی صورتحال یہی ہے کہ پاکستان کے ساتھ حکومت کی اجازت ملنے پر ہی کھیل سکتے ہیں، موجودہ صورتحال میں صرف آئی سی سی ایونٹس میں ہی دونوں ملکوں کی ٹیمیں آمنے سامنے آتی ہیں۔

بورڈ عہدیدار نے ویمنز چیمپئن شپ میں پاکستان اور بھارت کے میچز ممکن نہ ہونے پر ٹیکنیکل کمیٹی کی جانب سے پوائنٹس دونوں ٹیموں میں برابر تقسیم کرنے کے فیصلے کو سراہتے ہوئے مسرت کا اظہار کیا۔