دنیا بھر کی طرح پاکستان میں بھی کورونا کے وار جاری ہیں، نیشنل کمانڈ اینڈ آپریشن سینٹر کی جانب سے جاری اعداد و شمار کے مطابق گزشتہ 24 گھنٹوں کے دوران 157 نئے کیسز رپورٹ ہوئے ہیں جس کے بعد ملک بھر میں کورونا کے مصدقہ مریضوں کی تعداد 7638 ہوگئی۔
پنجاب میں سب سے زیادہ مریض
اعداد و شمار کے مطابق پنجاب میں کورونا وائرس کے سب سے زیادہ 3410 کیسز رپورٹ ہوئے۔ سندھ میں 2355، خیبر پختونخوا 1077، بلوچستان 335، اسلام آباد میں 163 جب کہ گلگت بلتستان اور آزاد کشمیر میں 48 کیسز رپورٹ ہوئے ہیں۔
خیبر پختونخوا سب سے خطرناک
اعداد و شمار کے مطابق گزشتہ 24 گھنٹوں کے دوران کورونا کا شکار 8 افراد دم توڑ گئے۔ خیبرپختونخوا میں کورونا سے سب سے زیادہ 50 اموات ہوئیں، سندھ میں 47، پنجاب میں 37، بلوچستان میں 5 ، گلگت بلتستان میں 3 جب کہ اسلام آباد میں کورونا کا ایک مریض جاں بحق ہوا۔
ترجمان سندھ حکومت بیرسٹر مرتضی وہاب نے کہا ہے کہ پچھلے 24 گھنٹوں کے دوران سندھ میں کورونا وائرس کے 138 نئے کیس سامنے آئے 18 اپریل کی صبح آٹھ بجے تک سندھ حکومت نے چوبیس گھنٹوں کے دوران 1666 افراد کے ٹیسٹ کیے جن میں 138 پازیٹیو رہے اور پچھلے چوبیس گھنٹوں میں الحمداللہ مزیر 11 مریض صحت یاب ہوئے۔
بیرسٹر مرتضی وہاب نے کہا کہ مجموعی طور پر اب تک صوبے میں 22 ہزار 938 ٹیسٹس کیے جاچکے ہیں جن میں سے 2 ہزار 355 کیسز پازیٹو رہے جبکہ باقی کے نتائج منفی رہے، صوبے میں اب تک 592 کورونا کے مریض شفایاب ہوچکے ہیں جب کہ ہلاکتوں کی مجموعی تعداد 48 ہے، یہ اعداوشمار اٹھارہ اپریل کی صبح آٹھ بجے تک کے ہیں۔
علاوہ ازیں انہوں نے ٹویٹ کے ذریعے بتایا کہ وائے بی پاکستان لمیٹڈ کی جانب سے کورونا ایمرجنسی فنڈ میں 2 کروڑ روپے کا عطیہ دیا گیا ہے، سندھ حکومت تمام فنڈز شفاف طریقے سے عوام کے لیے استعمال کرے گی۔
'اللہ کا شکر ہے بڑے نقصان سے بچ گئے'
کورونا صورتحال پر تبادلہ خیال کرتے ہوئے وزیراعظم کا کہنا تھا کہ دنیا بھر میں کورونا وائرس سے تبدیلی آئی ہے، کورونا سے جو صورت حال ہے اس کی پہلے مثال نہیں ملتی، ایسے حالات کا سامنا کررہے ہیں جو پہلے نہ تھے۔ پاکستان میں کورونا وائرس سے حالات بدل رہے ہیں، نیشنل کمانڈ اینڈ آپریشن سینٹر کی طرف سے روزانہ کی بنیاد پر صورت حال سے آگا ہ کیا جاتا ہے۔
وزیر اعظم نے کہا کہ پہلے یہ اندازہ تھا کہ 25 اپریل تک 50 ہزار مریض ہوں گے لیکن اللہ کا شکر ہے بڑے نقصان سے بچ گئے ہیں، اس ماہ ہمیں کوئی پریشانی نہیں ہوگی تمام تیاری مکمل ہے، ہمارے اسپتالوں میں سہولیات موجود ہیں، مئی کے مہینے تک ہم کورونا سے لڑنے کے لئے مزید تیاری کرلیں گے، اندازہ ہے کہ 15 سے 20 مئی تک کیس بڑھیں گے اور اسپتالوں پر دباؤ بڑھے گا۔
رمضان میں احتیاطی تدابیر ضروری
صدر مملکت ڈاکٹرعارف علوی کا کہنا ہے کہ کورونا کا پھیلاؤ روکنے کے لیے رمضان میں احتیاطی تدابیر ضروری ہیں۔ امید کرتا ہوں کہ مساجد میں احتیاطی تدابیر اختیار کی جائیں گی۔
ناک اور منہ ڈھانپنا لازمی قرار
بلوچستان حکومت نے کورونا وائرس کے پیش نظر صوبے بھر میں شہریوں کو ناک اور منہ ڈھانپنا لازمی قرار دے دیا ہے۔
بھارت سے آنے والوں میں کورونا
بھارت سے 2 روز قبل واپس آنے والے 41 پاکستانیوں میں سے 2 خواتین کے کورونا ٹیسٹ مثبت آئے ہیں جس کے بعد انہیں ایکسپو سینٹر قرنطینہ منتقل کردیا گیا ہے۔
کورونا وائرس اور احتیاطی تدابیر:
کورونا وائرس کے خلاف یہ احتیاطی تدابیر اختیار کرنے سے اس وبا کے خلاف جنگ جیتنا آسان ہوسکتا ہے۔ صبح کا کچھ وقت دھوپ میں گزارنا چاہیے، کمروں کو بند کرکے نہ بیٹھیں بلکہ دروازہ کھڑکیاں کھول دیں اور ہلکی دھوپ کو کمروں میں آنے دیں۔ بند کمروں میں اے سی چلاکر بیٹھنے کے بجائے پنکھے کی ہوا میں بیٹھیں۔
سورج کی شعاعوں میں موجود یو وی شعاعیں وائرس کی بیرونی ساخت پر اُبھری ہوئی پروٹین کو متاثر کرتی ہیں اور وائرس کو کمزور کردیتی ہیں۔ درجہ حرارت یا گرمی کے زیادہ ہونے سے وائرس پر کوئی اثر نہیں ہوتا لیکن یو وی شعاعوں کے زیادہ پڑنے سے وائرس کمزور ہوجاتا ہے۔
پانی گرم کرکے تھرماس میں رکھ لیں اور ہر ایک گھنٹے بعد آدھا کپ نیم گرم پانی نوش کریں۔ وائرس سب سے پہلے گلے میں انفیکشن کرتا ہے اور وہاں سے پھیپھڑوں تک پہنچ جاتا ہے، گرم پانی کے استعمال سے وائرس گلے سے معدے میں چلا جاتا ہے، جہاں وائرس ناکارہ ہوجاتا ہے۔
تبصرے
ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔