مچھلی کے شکار پر پابندی چند روز میں اٹھانے کا امکان

ماہی گیروں کو مشکلات سے نکالنے کا واحد حل مچھلی کے شکارسے پابندی ہٹانا ہے

Staff Reporter April 19, 2020

وفاقی وزیر علی زیدی کی زیرصدارت اجلاس،عبدالبرودیگرکومسائل کے حل کی یقین دہانی (فوٹو: فائل)

وفاقی وزیر علی زیدی نے کہا ہے کہ چند روز میں ماہی گیروں پر سے مچھلی کے شکار پر لگائی جانے والی پابندی کو اٹھانے کا باقاعدہ اعلان کر دیا جائے گا۔

کورونا وائرس اورلاک ڈاؤن کی وجہ سے مچھلی کے شکار پر پابندی سے سندھ کی ساحلی پٹی پر آباد لاکھوں ماہی گیروں کی بڑھتی ہوئی معاشی مشکلات کو مد نظر رکھتے ہوئے اورانھیں معاشی مشکلات سے نجات دلانے کی حکمت عملی طے کرنے کے لیے وفاقی وزیر شپنگ اینڈ بحری امور علی حیدر زیدی کی صدارت میں مشاورتی اجلاس ہوا جس میں فشر مینز کو آپریٹو سوسائٹی کے چیئرمین عبدالبر،چیئرمین فشریز ڈیولپمنٹ کمشنر ڈاکٹر صفیہ،کوآرڈینیٹر محمود مولوی ودیگر شریک تھے۔

اجلاس میں چیئرمین فشر مینز کو آپریٹو سوسائٹی عبدالبر نے معا شی مشکلات کا شکار لاکھوں ماہی گیروں کا مقدمہ لڑتے ہوئے وفاقی وزیر شپنگ اینڈ بحری امور علی حیدر زیدی کو بتایا کہ کرونا وائرس اور لاک ڈاؤن کے باعث مچھلی کے شکار پر لگائی جانے والی پابندی کی وجہ سے لاکھوں ماہی گیر شدید مالی مشکلات کا شکار ہو چکے ہیں۔

چیئرمین فشر مینز کو آپریٹو سوسائٹی عبدالبر نے مشاورتی اجلاس کو بتایا کہ فشر مینز کو آپریٹو سوسائٹی نے پاک بحریہ کے تعاون سے اب تک 20ہزار ماہی گیر خاندانوں میں راشن اور امدادی رقوم تقسیم کی ہیں۔مگر متاثرہ ماہی گیروں کی تعداد لاکھوں میں ہے۔ فشر مینز کو آپریٹو سوسائٹی کے پاس اتنے وسائل نہیں ہیں کہ وہ لاکھوں متاثرہ ماہی گیروں میں راشن اور خطیر رقم تقسیم کر سکے۔

چیئرمین فشر مینز کو آپریٹو سوسائٹی عبدالبر نے کہا کہ لاکھوں ماہی گیروں کو معاشی مشکلات سے نکالنے کا واحد حل مچھلی کے شکار پر لگائی جانے والی پابندی فوری طور پر اٹھانا ہوگی۔ طے شدہ ایس او پیز کا ماہی گیروں کو پابند بنایا جا سکتا ہے۔

وفاقی وزیر علی زیدی نے چیئرمین عبدالبر کو یقین دہانی کراتے ہوئے کہا کہ چند روز میں ایس او پیز طے کرکے ماہی گیروں پر سے مچھلی کے شکار پر لگائی جانے والی پابندی کو اٹھانے کا باقاعدہ اعلان کر دیا جائے گا۔