اسمگلنگ پر 14 سال قید وفاقی کابینہ نے آرڈیننس کی منظوری دیدی

غیر قانونی روٹس سے کرنسی، گندم، آٹا، چینی، چاول و دیگر اشیا کی ترسیل اسمگلنگ قرار

Numainda Express April 21, 2020

کسٹم نے ایکشن نہ لیا تو سیکریٹری قانون خود کارروائی کرینگے، آرڈیننس صدر کو ارسال۔ (فوٹو: فائل)

اسمگلنگ کرنے والے کو 14سال قید کی سزا ہوسکے گی، کابینہ کی منظوری کے بعد آرڈیننس صدر مملکت کو بھجوا دیا گیا۔

ذخیرہ اندوزوں کے بعد اسمگلنگ میں ملوث افراد کے گرد گھیرا تنگ کرنے کیلیے وفاقی کابینہ نے انسداد اسمگلنگ آرڈیننس کی منظوری دے دی۔ منظوری سرکولیشن سمری کے ذریعے دی گئی۔

آرڈیننس میں غیر قانونی روٹس سے کرنسی، گندم ،آٹا، چینی اور چاول اور دیگر اشیا کی ترسیل اسمگلنگ قراردی گئی ہے، اسمگلنگ کرنے والے کو 14سال قید کی سزا ہوسکے گی۔ کابینہ کی منظوری کے بعد آرڈیننس صدر مملکت کو بھجوا دیا گیا ہے۔ اسمگلنگ میں ملوث افراد یا سہولت کاروں کو بھی 14سال قید کی سزا ہوسکے گی ۔

آرڈیننس کے مطابق کسٹمز ایکٹ کے تحت قانونی روٹس سے ہی اشیاء کی ترسیل قانونی طور پر جائز ہو گی۔کسٹم حکام نے شکایت کے باوجود ایکشن نہ لیا تو وفاقی سیکرٹری برائے قانون خود کارروائی کرینگے ۔ صدر مملکت عارف علوی کے دستخط کے بعد آرڈیننس نافذ کر دیا جائے گا۔