وسیم فکسنگ کی آفر کرتے توجان سے مار دیتا شعیب اختر

سابق کپتان نے مجھ سے کبھی ایسی بات نہیں کی، شعیب اختر ۔ فوٹو: فائل

---

شعیب اختر نے کہا ہے کہ وسیم اکرم فکسنگ کی پیشکش کرتے تو جان سے مار دیتا۔

ویب سائٹ ''کرکٹ پاکستان'' کے مطابق ایک انٹرویو میں شعیب اختر نے کہاکہ90 کی دہائی میں وسیم اکرم نے اپنی شاندار بولنگ سے پاکستان کو کئی ایسی فتوحات دلائیں جو ایک وقت میں ناممکن نظر آ رہی ہوتیں، اگر پیسر مجھے میچ فکسنگ کیلیے کہتے توانھیں تباہ کرکے رکھ دیتا، یہاں تک کہ جان سے ہی مار دیتا لیکن انھوں نے مجھ سے کبھی ایسی بات نہیں کی۔

سابق پیسر نے کہا کہ مجھے وسیم اکرم کے ساتھ7 یا 8 سال کھیلنے کا موقع ملا، کیرِیئر کے آغاز میں مجھے ان کی رہنمائی اور حوصلہ افزائی حاصل رہی، ٹاپ آرڈر کا صفایا کرکے باقی وکٹیں میرے لیے چھوڑ دیتے، جس اینڈ سے ان کو زیادہ وکٹیں مل رہی ہوتیں، وہاں بھی مجھے بولنگ کا موقع دے دیتے، پرانے میچز کی ویڈیوز دیکھنے کے بعد وسیم اکرم کو فون کرکے معذرت کی کہ اس وقت وہ خراج تحسین پیش کرسکا جس کے آپ مستحق تھے۔

شعیب اختر کے ٹی وی پر کہے گئے ان جملوں پر بحث چل نکلی کہ انھوں نے ایساکیوں کہا، جواب میں سوشل میڈیا کا سہارا لیتے ہوئے اسپیڈ اسٹار نے کہا کہ میں نے یہ کہا ہے کہ اگر فکسنگ کی پیشکش کرتے تو تباہ کردیتا لیکن واضح کردینا چاہتا ہوں کہ انھوں نے ہرگز ایسا نہیں کیا۔

یاد رہے کہ کرکٹ کی تاریخ میں سب سے تیز گیند کرنے کا اعزاز رکھنے والے شعیب اختر اپنے بلند بانگ تبصروں کیلیے بھی مشہور ہیں۔