عالمی کرکٹ کے بڑے آج سر جوڑ کر بیٹھیں گے

ٹیسٹ چیمپئن شپ اور ون ڈے لیگ کے مستقبل پرٹیلی کانفرنس میں غور

Sports Desk April 23, 2020

ویران میدان آباد کرنے کی تاریخوں پر تبادلہ خیال ہوگا،وسیم خان بھی شریک۔ فوٹو: فائل

عالمی کرکٹ کے بڑے جمعرات کو سر جوڑ کر بیٹھیں گے، ٹیسٹ چیمپئن شپ اور ون ڈے لیگ کے مستقبل پرغور ہوگا۔

انٹرنیشنل کرکٹ کونسل کی چیف ایگزیکٹیوز کمیٹی کے ارکان جمعرات کو اہم ٹیلی کانفرنس میں شریک ہوں گے، پاکستانی وسیم خان سمیت12 فل ممبران اور 3 ایسوسی ایٹ ممالک کے نمائندے کورونا وائرس سے معطل ہونے والی کرکٹ کو پھر بحال کرنے کے مختلف آپشنز پر غور کرینگے۔

ایجنڈے میں سرفہرست ٹیسٹ چیمپئن شپ اور ون ڈے سپر لیگ ہے، اب تک انگلینڈ کی سری لنکا سے ٹیسٹ سیریز ملتوی ہوچکی جبکہ ویسٹ انڈیز اور پاکستان سے طویل طرز کے میچز غیریقینی کے شکار ہیں، اسی طرح آسٹریلیا کی بنگلہ دیش سے ٹیسٹ سیریز کے بارے میں بھی کچھ نہیں کہا جا سکتا۔

ون ڈے سپر لیگ کا آغاز مارچ میں انگلینڈ اور سری لنکا کے درمیان میچز سے ہونا تھا جو ملتوی ہوچکے، جنوبی افریقہ بھی اپنی سیریز ملتوی کرنے کا اعلان کرچکا ہے۔ اسی لیگ سے 2023 میں شیڈول ون ڈے ورلڈ کپ کیلیے براہ راست کوالیفائی کرنے والی 8 ٹیموں کا فیصلہ ہونا ہے۔

موجودہ صورتحال میں آئی سی سی کیلیے سب سے بڑا چیلنج متبادل تاریخیں تلاش کرنا ہوگا تاکہ موجوہ ٹائم فریم میں ہی تمام سیریز مکمل کی جائیں، خاص طور پر ٹیسٹ چیمپئن شپ کے میچزآئندہ برس جون سے قبل ختم کرنے ہونگے، اسی صورت میں ہی لارڈز میں فائنل ٹیسٹ اپنے وقت پر منعقد ہوسکے گا، اس کا التوا آخری آپشن ہوگا۔

جمعرات کی میٹنگ میں ممبر بورڈزسے اپنے اپنے ممالک میں کرکٹ دوبارہ سے شروع کرنے کے ارادوں کا پوچھا جائے گا،پھر اسی کو مدنظر رکھتے ہوئے مستقبل کا لائحہ عمل تیار ہوگا جس کو پھر آئی سی سی بورڈ کو بھیجا جائے گا۔

میٹنگ میں رواں برس آسٹریلیا میں شیڈول ٹی 20 ورلڈ کپ کے حوالے سے بھی تبادلہ خیال ہونا ہے، اس حوالے سے ممبران کواپ ڈیٹ بھی کیا جائے گا، فی الحال ایونٹ کے بارے میں کسی فیصلے کی کوئی توقع نہیں ہے۔