اولڈ سٹی ایریا میں پانی کی شدید قلت مکین پریشان

عثمان آباد، غازی نگر، گھاس منڈی ،کھارادر اور دیگر علاقوں میں کئی ماہ سے پانی نہیں آرہاہے

Staff Reporter April 26, 2020

گنجان آبادی والے علاقوں میں گزشتہ کئی برس سے واٹربورڈ کا عملہ ہی پانی چوری میں ملوث ہے،مکین ۔ فوٹو : فائل

اولڈ سٹی ایریا عثمان آباد، غازی نگر اور گھاس منڈی کے علاقوں میں پانی کی شدید قلت ہے جو لاک ڈاؤن اور رمضان کی وجہ سے شدید بحرانی کیفیت اختیار کرچکی ہے۔

صدیق وہاب روڈ پر واقع آبادی کا بڑا حصہ جہاں لاک ڈاؤن سے بیروزگاری کا شکار ہے وہیں اب گھروں میں رہنے والے تمام افراد پانی کی قلت سے شدید پریشان ہیں، اس ضمن میں واٹربورڈ کے متعلق حکام اور علاقے کے ایم پی اے سے بھی گزارش کی گئی لیکن اب تک کوئی داد رسی نہیں ہوئی ہے،مکینوں کے مطابق کراچی واٹر اینڈ سیوریج بورڈ کے لائن مین اس میں ملوث ہے۔

کئی برس تک پانی کی کمی رہی اور اب گزشتہ چھ ماہ سے پانی بالکل غائب ہوچکا ہے،اب یہ حال ہے کہ پانی کی لائن میں تعفن زدہ اورگندا پانی آرہا ہے جس سے علاقہ مکین شدید پریشان ہیں، مکینوں نے بتایا کہ مبینہ طور پر واٹر بورڈ کا عملہ بالخصوص لائن مین پانی کی لائنیں فروخت کرنے میں پیش پیش ہے اور اس ضمن میں لاکھوں روپے کمارہا ہے، نمائندہ ایکسپریس کو علاقہ مکینوں نے بتایا کہ رمضان المبارک کی حرمت اور پانی کی ضرورت کا پاس رکھتے ہوئے فوری طور پر ہزاروں لاکھوں افراد کی داد رسی کی جائے تاکہ علاقے میں پانی کی قلت کا دیرینہ مسئلہ حل ہوسکے۔