ترسیل میں رکاوٹیں کراچی میں گندم اور آٹے کی قلت قیمتیں بڑھنے کا خدشہ

محکمہ خوراک کاعملہ گندم کی ترسیل میں رکاوٹیں ڈال رہا ہے، 20 فلورملز بند ہوجائیں گی، پاکستان فلور ملز ایسوسی ایشن

Ehtisham Mufti April 28, 2020

دفعہ144کی آڑ میں نوشہروفیروز، نواب شاہ، گھوٹکی، محراب پور اور لاڑکانہ سے آنیوالی گندم کی ترسیل روکی جارہی ہے، خالد مسعود

MANCHESTER: محکمہ خوراک سندھ کی کراچی کے لیے اندرون سندھ سے خریدی گئی گندم کی ترسیل میں رکاوٹوں کے باعث کراچی میں گندم اور آٹے کی دستیابی اور قیمتوں کا بحران اٹھنے کا خدشہ پیدا ہوگیا ہے۔

فلور ملز مالکان نے بتایا کہ سندھ کی فلورملوں کو گندم کی قلت کا سامناہے جس کی وجہ سے پیرکوفی 100کلوگرام گندم کی قیمت 3500 روپے سے بڑھ کر 3800روپے ہوگئی ہے۔ پاکستان فلور ملز ایسوسی ایشن سندھ ریجن کے چیئرمین خالد مسعود نے ایکسپریس کو بتایاکہ سیکریٹری خوراک سندھ کے ساتھ اس ضمن میں اجلاس کے دو دور ہوچکے ہیں جس میں انھوں نے محکمہ خوراک کے متعلقہ حکام کو کراچی کے لیے گندم کی ترسیل میں کسی قسم کی رکاوٹ نہ ڈالنے کے واضح احکامات جاری کیے لیکن ان احکامات کے باوجود محکمہ خوراک کا نچلا عملہ گندم کی ترسیل میں بدستور رکاوٹیں ڈال رہا ہے ۔

خالد مسعود نے بتایاکہ گندم کی ترسیل میں رکاوٹ سے آئندہ2دن میں 20 فلورملیں بند ہوجائیں گی اور آئندہ72گھنٹوں میں گندم کی ترسیل معقول انتظام نہ کیاگیا توکراچی کی آپریشنل 73 فلورملیں اپنی پیداواری سرگرمیاں بند کرنے پرمجبور ہونگی جس کی تمام ذمہ داری محکمہ خوراک سندھ پر عائد ہوگی۔