امریکی گلوکارہ لیڈی گاگا کا طبی عملے کے نام ’لو لیٹر‘

لیڈی گاگا نے براہ راست ٹی وی پروگرام میں طبی عملے کے نام محبت نامہ گا کر سنایا، فوٹو : فائل

---

معروف امریکی گلوکارہ لیڈی گاگا نے جان کی پرواہ نہ کرتے ہوئے کورونا وائرس میں مبتلا مریضوں کا علاج کرنے والے طبی عملے کے نام پیار بھرا خط لکھ کر خراج تحسین پیش کیا اور اسے براہ راست ٹی وی پروگرام میں پڑھ کر بھی سنایا۔

کورونا وائرس وبا کی اعصاب شکن جنگ میں طبی عملہ ہراول دستے کا کردار ادا کر رہا ہے اور دنیا بھر میں انہیں خراج تحسین پیش کرنے کا سلسلہ جاری ہے، دلچسپ اور منفرد طریقوں کو اپناتے ہوئے طبی عملے کی حوصلہ افزائی کی جارہی ہے۔ عالمی شہرت یافتہ امریکی گلوکارہ لیڈی گاگا نے طبی عملے کے نام محبت نامہ ہی لکھ دیا۔

امریکی گلوکارہ لیڈی گاگا نے ساتھی گلوکاروں کے ہمراہ ٹیلی وژن پر طبی عملے کی خدمات کو سراہنے اور ان کے جذبے کو خراج تحسین پیش کرنے سے متعلق میوزیکل پروگرام میں شرکت کی اور طبی عملے کے نام لکھے گئے اپنے 'لو لیٹر' کو پڑھ کر سنایا اور کچھ سطریں گنگنائی بھی۔ خط میں تحریر تھا کہ طبی عملے نے اپنی جانفشانی سے میرا دل جیت لیا ہے اور ان کا شکریہ ادا کرنے کے لیے میرے پاس الفاظ نہیں۔ طبی عملہ میرے ان الفاظ کو میری جانب سے ایک 'لولیٹر' سمجھیں۔

قبل ازیں 'ون ورلڈ، ٹوگیدر ایٹ ہوم' کے نام سے بھی ایک پروگرام پیش کیا گیا تھا جس میں امریکا کی سابق خاتون اول مشعل اوباما نے بھی شرکت کی تھی، اس پروگرام میں امریکا کے سپر اسٹار اداکروں، گلوکاروں، کھلاڑیوں اور کامیڈین نے اپنے گھروں میں فلمائی گئی ویڈیوز پیش کیں جن میں طبی عملے کو خراج تحسین پیش کیا گیا تھا۔

واضح رہے کہ اس پروگرام کو عالمی ادارہ صحت نے ایک غیر منافع بخش تنظیم کے اشتراک سے پیش کیا تھا جس کا مقصد کورونا وائرس وبا میں طبی عملے کی اہمیت اور کردار کو اجاگر کرنا تھا۔