طور خم بارڈر پر تعینات پاک فوج کے میجر اصغر کورونا وائرس سے شہید

میجر اصغر بارڈر پر افغانستان سے واپس آنے والے افراد کی اسکریننگ کی ذمہ داریاں ادا کررہے تھے، ڈی جی آئی ایس پی آر (فوٹو : آئی ایس پی آر)

---

کورونا وائرس کے سبب طورخم بارڈر پر تعینات پاک فوج کے میجر محمد اصغر شہید ہوگئے۔

ڈی جی آئی ایس پی آر نے کہا ہے کہ کورونا وائرس کی وجہ سے ایک ایسے وقت میں جب سب لوگ گھروں میں محصور ہو رہے ہیں تو افواجِ پاکستان فرنٹ لائن پر لوگوں کی خدمت کے لیے نکلی ہوئی ہے، میجر محمد اصغر طور خم بارڈر ٹرمینل پر اپنے فرائض سر انجام دے رہے تھے جب افغانستان میں پھنسے لوگوں کی واپسی شروع ہوئی تو آپ کے ذمہ بارڈر ٹرمینل پر اسکریننگ کی ذمہ داری سونپی گئی۔

ڈی جی آئی ایس پی آر کے مطابق میجر محمد اصغر کو اچانک سینے میں تکلیف اٹھی اور سانس لینے میں دقت کا سامنا ہوا جس کے باعث انہیں سی ایم ایچ پشاورمنتقل کیا گیا، انہیں وینٹی لیٹر پرمنتقل کیا گیا لیکن وہ جانبر نہیں ہوسکے۔

Major Muhammad Asghar laid his life in the line of duty at #Torkham border in fight against #COVID-19. Evacuated to CMH Peshawar with breathing problems, was put on ventilator but succumbed to Corona Virus. There is no cause bigger than serving the Nation.#OurMartyrsOurHeroes pic.twitter.com/3mtCKyRycq

— DG ISPR (@OfficialDGISPR) May 10, 2020

ڈی جی آئی ایس پی آر کا کہنا ہے کہ آرمی چیف نے انہیں ہدایات دی تھیں کہ لوگوں تک پہنچیں اور اُن کی مشکلات میں آسانی پیدا کریں اور میجر محمد اصغر ہم وطنوں کو کورونا وائرس سے بچاتے ہوئے خالقِ حقیقی سے جا ملے۔

ترجمان پاک فوج نے مزید کہا کہ میجر اصغر نے فرض کی ادائیگی میں کئی لوگوں کو اس وبا سے محفوظ رکھنے میں بھر پور کردار ادا کیا، جان تو دے دی لیکن مقدس فریضے کو آخری وقت تک نبھاتے رہے، قوم اپنے اس ہیرو کو سَلام پیش کرتی ہے۔