کورونا وائرس امریکا کی چین سے تعلقات ختم کرنے کی دھمکی

چینی صدر سے اچھے تعلقات ہیں لیکن ان سے بلکل بات نہیں کرنا چاہتا، ڈونلڈ ٹرمپ۔ فوٹو: فائل

---

کورونا وائرس کے معاملے پر امریکی صدر ڈونلڈ ٹرمپ نے چین سے تعلقات ختم کرنے کی دھمکی دیدی ہے۔

دنیا بھر بالخصوص امریکا میں کورونا وائرس کی تیزی سے بڑھتی وبا نے امریکا اور چین کے درمیان فاصلے مزید بڑھادیے ہیں، امریکا کی جانب سے آئے دن چین کے خلاف نئے الزامات اور سخت بیانات میڈیا کی زینت بنتے ہیں، اب ایک بار پھر امریکی صدر نے چین سے تعلقات مکمل طور پر ختم کرنے کی دھمکی دیدی ہے۔

اس خبر کو بھی پڑھیں : کورونا ویکسین کے فارمولے کو ہیک کرنے کی کوشش

فاکس نیوز کو دیے گئے انٹرویو میں امریکی صدر ڈونلڈ ٹرمپ کا کہنا تھا کہ چینی صدر شی جن پنگ سے اچھے تعلقات ہیں لیکن اس وقت ان سے بالکل بات نہیں کرنا چاہتا کیونکہ چین کی جانب کورونا وائرس پر قابو پانے سے متعلق معاملے پر سخت مایوسی کا سامنا کرنا پڑا، چین کے خلاف کارروائی میں امریکا کچھ بھی کرسکتا ہے بلکہ بہت کچھ کرسکتا ہے، ہم چین سے نہ صرف تمام تعلقات ختم کرسکتے ہیں بلکہ اس معاملے نے جنوری میں بیجنگ سے ہونے والے تجارتی معاہدے کو بھی متاثر کیا ہے۔

اس خبر کو بھی پڑھیں : ڈونلڈ ٹرمپ کا عالمی ادارہ صحت کی فنڈنگ روکنے کا حکم

واضح رہے کہ کورونا وائرس کی وبا کے آغاز سے ہی امریکا اور چین کے درمیان کشیدگی میں اضافہ ہوگیا تھا اور صدر ڈونلڈ ٹرمپ نے مہلک وائرس کی ووہان لیبارٹری میں تیاری کا الزام عائد کیا تھا جس پر چین نے دعویٰ کیا تھا کہ کورونا وائرس امریکی فوجی ووہان لائے تھے۔