کراچی میں ایک دن کے دوران 657 افراد میں کورونا کی تصدیق

سندھ میں اس وقت 12472 مریض زیرعلاج ہیں، سید مراد علی شاہ فوٹو: فائل

---

گزشتہ 24 گھنٹوں کے دوران سندھ میں کورونا کے مزید 864 کیسز سامنے آئے ہیں جن میں سے 657 کا تعلق شہر قائد سے ہے۔

سندھ میں کورونا کی صورتحال سے متعلق اپنے وڈیو پیغام میں مراد علی شاہ نے کہا کہ اب تک ایک لاکھ 27 ہزار 573 ٹیسٹ کئے گئے ہیں جس میں 17 ہزار 241 مریض سامنے آئے ہیں، گزشتہ 24 گھنٹوں کے دوران صوبے بھر میں کورونا کے 4 ہزار 679 ٹیسٹ کئے جب کہ 864 نئے مریض ظاہر ہوئے، آج 280 مزید مریض صحتیاب ہوکر نارمل زندگی کی جانب لوٹ گئے اور اب صحتیاب ہونے والے مریضوں کی تعداد 4489 ہوگئی ہے۔ اس وقت 12472 مریض زیرعلاج ہیں، جن میں سے 11 ہزار 95 گھروں، 815 مراکزاور 562 اسپتالوں میں ہیں۔

مراد علی شاہ نے کہا کہ صوبے میں کورونا کے مزید 3 مریض انتقال کرگئے ہیں، جس کے بعد اس وائرس سے جاں بحق افراد کی تعداد 280 ہوگئی ہے، 136 مریضوں کی حالت تشویشناک ہے جس میں 29 وینٹی لیٹرز پر ہیں۔

وزیر اعلیٰ سندھ نے بتایا کہ 864 کیسز میں 657 نئے کیسز کا تعلق کراچی سے ہیں، ضلع شرقی میں 171، ملیر میں 141 ، ضلع جنوبی 117 ، ضلع وسطی میں 94 ، کورنگی میں 75 اور ضلع غربی 59 مزید کیسز سامنے آئے، اس کے علاوہ گھوٹکی میں 31، جیکب آباد میں 30 ، لاڑکانہ میں 21 ، سکھر میں 17، شکارپور اور قمبر شہدادکوٹ میں 7،7، ٹھٹہ اور کشمور کندھ کوٹ میں 5،5 ، مٹیاری اور نوشہروفیروز میں 2-2 نئے کیسز رپورٹ آئے۔

وزیراعلیٰ سندھ نے عوام کو ایک بار پھر احتیاط کرنے کی ہدایت کرتے ہوئے کہا کہ ہمیں کورونا کے ساتھ رہنے کیلئے احتیاطی تدابیر سیکھنا ہوں گی۔