پولیس اور رینجرز کی جرائم پیشہ افراد کیخلاف کارروائیاں51ملزمان گرفتار

بھاری تعداد میں اسلحہ اور منشیات برآمد ہوئی،ملزمان میں کئی افراد کے قتل میں ملوث ٹارگٹ کلرز بھی شامل ہیں

Staff Reporter December 08, 2013

گارڈن پولیس نے مفرور ملزمان کی موجودگی کی اطلاع پر چھاپہ مارتے ہوئے2افراد سلیمان اور غلام مرتضیٰ کو گرفتار کرلیا. فوٹو: اے پی پی/فائل

پولیس و رینجرز نے جرائم پیشہ افراد کے خلاف کارروائیاں کرتے ہوئے 51 ملزمان کو گرفتار کرکے ان کے قبضے سے بھاری تعداد میں اسلحہ اور منشیات برآمد کرلی، ملزمان میں کئی افراد کے قتل میں ملوث ٹارگٹ کلر بھی شامل ہیں۔

تفصیلات کے مطابق رینجرز نے رنچھوڑ لائن میں کارروائی کرتے ہوئے2ملزمان کو حراست میں لیکر تفتیش کی غرض سے نامعلوم مقام پر منتقل کردیا ، ذرائع نے بتایا کہ ملزمان کے قبضے سے ایس ایم جی برآمد ہوئی جبکہ ملزمان قتل کی متعدد وارداتوں میں ملوث تھے،اسپیشل انویسٹی گیشن یونٹ (ایس آئی یو) نے رنچھوڑ لائن میں کارروائی کرتے ہوئے تاجروں سے بھتہ طلب کرنے اور نہ دینے پر دکان پر فائرنگ کرنے والے3ملزمان عابد زیب خان ، راجہ امیر عباس جعفری اور سید راشد حسین شاہ کو گرفتار کرکے ملزمان کے قبضے سے اسلحہ برآمد کرلیا، خواجہ اجمیر نگری پولیس نے علاقے میں کارروائی کرتے ہوئے ملزم رانا داس کو گرفتار کرکے اس کے قبضے سے ٹی ٹی پستول اور بلال کالونی کے علاقے سے چھینی موٹر سائیکل برآمد کرلی۔

ملزم اسٹریٹ کرائم اور گھروں میں ڈکیتی کی متعدد وارداتوں میں مطلوب تھا، گارڈن پولیس نے مفرور ملزمان کی موجودگی کی اطلاع پر چھاپہ مارتے ہوئے2افراد سلیمان اور غلام مرتضیٰ کو گرفتار کرلیا، ملزمان کے قبضے سے بڑی تعداد میں اسلحہ اور منشیات برآمد کرلی گئی، رینجرز نے گلشن اقبال، خاموش کالونی، بلدیہ ٹاؤن سیکٹر 5، سلطان آباد، مومن آباد، لیاری، گلبرگ بلاک7،حاجی مرید گوٹھ اور لیاقت آباد میں جرائم پیشہ افراد کے خلاف چھاپہ مار کارروائیاں کیں جبکہ رنچھوڑ لائن ، بھٹائی آباد ، موسمیات چوک اور پاور ہاؤس پر اسنیپ چیکنگ بھی کی ، رینجرز کے ترجمان میجر سبطین کے مطابق مذکورہ کارروائیوں کے دوران مجموعی طور پر 20 ملزمان کو گرفتار کرکے ان کے قبضے سے اسلحہ برآمد کرلیا گیا ، ملزمان سے تفتیش کا آغاز کردیا گیا ہے ، دریں اثنا ایسٹ زون پولیس نے مختلف کارروائیوں کے دوران 23 ملزمان کو گرفتار کرلیا ، ملزمان میں ایک ٹارگٹ کلر اور 3 مفرور ملزمان بھی شامل ہیں ، ملزمان کے قبضے سے بڑی تعداد میں اسلحہ اور منشیات برآمد کرلی گئی۔