کراچی فائرنگ تشدد اور بم حملے متحدہ کے کارکن سمیت6 ہلاک

گزشتہ روز مسکن چورنگی پر فائرنگ سے جاں بحق ہونےوالے دو سگے بھائیوں اور ان کے کزن کا جسد خاکی آخری آرام گاہ لے جایا جارہا ہے۔فوٹو:محمد عظیم/ایکسپریس

---

شہر کے مختلف علاقوں میں فائرنگ،تشدد،بم حملوں کے نتیجے میں متحدہ قومی موومنٹ کے کارکن سمیت6افرادہلاک اور9زخمی ہوگئے۔

تفصیلات کے مطابق لیاری میں ہفتے کی شب دوبارہ لیاری گینگ وار کے دونوں گروپ کے کارندوں نے ایک دوسرے کے علاقوں پرحملے شروع کر دیے۔ کلاکوٹ کے علاقے افشانی گلی کے قریب رائفل گرینیڈ اور دستی بم حملے ہوئے جو زور دار دھماکو سے پھٹ گئے جس سے علاقے میں خوف ہراس پھیل گیا،دستی بم حملے میں25 سالہ ذاکر بلوچ زخمی ہوگیا،واقعے کے بعدعلاقے میں دو فائرنگ کا سلسلہ شروع ہو گیا اسی دوران کلاکوٹ کے علاقے جھٹ پٹ مارکیٹ کے قریب گینگ وار کے ملزمان کی فائرنگ کی زد میں آکر20 سالہ زبیرکچھی ہلاک ہو گیا، مقتول جھٹ پٹ مارکیٹ کے قریب کا ہی رہائشی اور جھٹ پٹ مارکیٹ میں بچوں کے کھلونے فروخت کرتاتھا۔ آخری اطلاعات تک فائرنگ کا سلسلہ جاری تھا۔نارتھ ناظم آباد فائیواسٹار چورنگی پر نامعلوم موٹر سائیکل سوار ملزمان کی رکشاپر فائرنگ سے40سالہ رکشا ڈرائیور سید افتخار زیدی ہلاک ہو گیا۔مقتول نارتھ کراچی سیکٹر 11/C کا رہائشی اور 3 بچوں کا باپ تھا جبکہ وہ اسٹیل مل کا ملازم اور متحدہ قومی موومنٹ نیوکراچی سیکٹر یونٹ 133 کا کارکن تھا،اسٹیل مل میں تنخواہوں کے بحران کے باعث وہ پارٹ ٹائم میں رکشا چلاتا تھا۔گلستان جوہر بلاک 16 میں نامعلوم افرادکی فائرنگ سے زخمی ہونے والاسیکیورٹی گارڈ لیاقت دوران علاج دم توڑ گیا۔



یاسین آبادمیں اے ون کاٹیجزمیں فائرنگ سے سیکیورٹی گارڈ 30 سالہ شوکت ہلاک ہوگیا۔پولیس کے مطابق شوکت کو اس کے ساتھی گارڈنثارنے جھگڑے پرفائرنگ کرکے ہلاک کیاہے،مقتول علاقے میں ہی قائم ایک کوارٹر میں رہائش پذیرجبکہ اس کا آبائی تعلق مظفر گڑھ سے تھا۔سعیدآبادکے علاقے سیکٹر7سجن گوٹھ میں نامعلوم افرادکی فائرنگ سے 28 سالہ عبدالرشیدہلاک ہوگیا، مقتول کا علاقے میں بھینسوں کا باڑہ جبکہ شیرشاہ مارکیٹ میں کباڑ کی دکان بھی ہے،پولیس نے خدشہ ظاہر کیا کہ واقعہ بھتہ خوری کا شاخسانہ ہے۔ایف بی ایریاصنعی علاقے لیاری ایکسپریس وے کے قریب25سالہ شخص کی لاش ملی جس کی شناخت نہیں ہوسکی،لاش کئی روزپرانی بتائی جاتی ہے۔کورنگی نمبرساڑھے3 میں نامعلوم ملزمان کی فائرنگ سے 18سالہ قیصر،لانڈھی اسپتال چورنگی کے قریب چھریوں کے وارسے 45 سالہ رئیس اوراس کابیٹا20 سالہ عمران ،نیوکراچی اﷲ والی چورنگی پر16 سالہ رجب علی،شیریں جناح کالونی میں رب نواز،شاہ لطیف ٹائون میں نامعلوم افرادکی فائرنگ سے 30 سالہ علی حسن ، ملیر گلشن قادری میں 35سالہ ابراہیم زخمی ہوگیا۔