کورونا کے پیش نظر مزید 2200 ڈاکٹرز بھرتی کرنے کا فیصلہ

بھرتی کیلیے ایس پی ایس سی کو لکھا جائے، طبی جامعات اور تھیلیسیمیا سینٹرز کو فنڈز جاری کیے جائیں، چیف سیکریٹری

Staff Reporter June 30, 2020

کورونا وبا کے پیش نظربھرتی کیے گئے ڈاکٹرز، طبی اور ٹیکنیکل اسٹاف کو تنخواہیں جاری کی جائیں، سید ممتاز علی شاہ فوٹو، فائل

چیف سیکریٹری سندھ سید ممتاز علی شاہ اور صوبائی وزیر صحت ڈاکٹر عذرا پیچوہو کی زیر صدارت محکمہ صحت کا اہم اجلاس ہواجس میں سیکریٹری خزانہ سید حسن نقوی، سیکریٹری صحت ڈاکٹر کاظم جتوئی اور وائس چانسلر ڈاؤ یونیورسٹی پروفیسر ڈاکٹر محمد سعید قریشی سمیت محکمہ صحت اور محکمہ خزانہ کے افسران نے شرکت کی۔

اجلاس میں کورونا وائرس کے پیش نظر بھرتی کیے گئے ڈاکٹرز، پیرا میڈیکل اسٹاف اور ٹیکنیکل اسٹاف کو تنخواہیں جاری کرنے کا فیصلہ کیا گیا، ممتاز علی شاہ نے سیکریٹری خزانہ کو ہدایت کرتے ہوئے کہا کہ میڈیکل جامعات اور تھیلیسیمیا سینٹرزکو فنڈز جاری کیے جائیں، صوبے کے اسپتالوں میںآئی سی یو اور ایچ ڈی یوز کے تعداد میں اضافہ کیا جا رہا ہے۔

حکومت سندھ نے بجٹ میں صحت کے شعبے کو ترجیح دی ہے،انھوں نے سیکریٹری صحت کو ہدایت کرتے ہوئے کہاکہ 2200 مزید ڈاکٹرز بھرتی کرنے کیلیے سندھ پبلک سروس کمیشن کو لکھا جائے، میڈیکل جامعات اور کالجز میں ٹیکنیکل سیٹس بڑھانے کے لیے بھی ہائیر ایجوکیشن کمیشن کو لکھا جائے، وزیر صحت ڈاکٹر عذرا پیچوہو نے بتایاکہ مختلف اسپتالوں میںآئی سی یواور ایچ ڈی یوزکی تعداد بڑھائی جارہی ہے،اس وقت 400 سے زائد ڈاکٹرز ٹیلی میڈیسن کی سروسز دے رہے ہیں اور مزید 250 ڈاکٹرز کی خدمات حاصل کرنے کے لیے ایم او یو بھی کیا گیا ہے۔