اسٹاک ایکسچینج حملے کے دہشت گردوں کو افغانستان سے ہدایات ملنےکا انکشاف

کراچی میں موجود ایک دہشت گرد نے 2 سہولت کاروں کے ساتھ حملے کی پلاننگ مکمل کی، تفتیشی ذرائع

Sajid Rauf July 01, 2020

دہشت گرد سلمان کراچی میں ہی موجود تھا جب کہ دیگر 3 دہشت گرد حب کے راستے سے کراچی آئے، تفتیشی ذرائع۔ فوٹو:فائل

تفتیش میں انکشاف ہوا ہے دہشت گردوں کے تانے بانے افغانستان سے ملتے ہیں۔

ایکسپریس نیوز کے مطابق پاکستان اسٹاک ایکسچینج حملے سے متعلق تحقیقات میں مزید پیشرفت سامنے آئی ہے اور تفتیش میں انکشاف ہوا ہے کہ دہشت گردوں کے تانے بانے افغانستان سے ملتے ہیں، دہشت گردوں کو افغانستان کے شہر قندھار سے ہدایت بھی ملتی رہی ہیں، جب کہ دہشت گردوں کے قبضے سے اسمارٹ فون سمیت دو موبائل فونز ملے تھے اور موبائل فونز کا ڈیٹا حاصل کر لیا گیا ہے۔

تفتیشی ذرائع نے بتایا ہے کہ دہشت گرد سلمان کراچی میں ہی موجود تھا اور دیگر 3 دہشت گرد حب کے راستے سے کراچی آئے، کراچی میں موجود ایک دہشت گرد نے 2 سہولت کاروں کے ساتھ حملے کی پلاننگ مکمل کی، جب کہ حملہ آور 4 روز قبل پاکستان اسٹاک ایکسچینج کی مکمل ریکی کر چکے تھے۔