اسکولوں کے طلبا اور اساتذہ کو سیکیورٹی دی جائےایڈیشنل آئی جی

بھتہ وصولی کے حوالے سے دھمکیوں میں ملوث ملزمان کی گرفتاری یقینی بنائی جائے

Staff Reporter December 10, 2013

شہریوں کو ہراساں کرنے والے جرائم پیشہ عنصر اور ان کے گروہوں کی بیخ کنی کے لیے بلاامتیاز کارروائیاں کی جائے،ایڈیشنل آئی جی۔ فوٹو: اے پی پی / فائل

شہر میں پرائیویٹ اسکولز کو بھتہ مافیا کی جانب سے دھمکیوں اور بھتے کی پرچیوں کی شکایات کا نوٹس لیتے ہوئے ایڈیشنل آئی جی کراچی شاہد حیات نے پیک پرائیویٹ اسکولز مینجمنٹ ایسوسی ایشن سندھ کے وفد سے چیئرمین حیدر علی کی سربراہی میں خصوصی ملاقات کی۔

ایڈیشنل آئی جی نے تعلیمی سرگرمیوں میں مصروف تعلیمی اداروں کے طلبہ و طالبات، اساتذہ و دیگر اسٹاف کی سیکیورٹی کے غیر معمولی اقدامات اختیار کرنے اور ہر سطح پر عملدرآمد کو یقینی بنانے کی ہدایات تمام زونل ڈی آئی جیز و ضلعی ایس ایس پیز کو جاری کیں، اس موقع پر ایس ایس پی ایس آئی یو فاروق اعوان بھی موجود تھے۔

انھوں نے پولیس کو ہدایات جاری کیں کہ بھتہ کلیکشن ، بھتے کی پرچیوں اور بھتہ وصولی کے حوالے سے دھمکیوں سے متاثرہ تاجروں، دکانداروں، فیکٹری اور اسکول مالکان کی جانب سے درج کردہ ایف آئی آر کے تحت ملزمان کی یقینی گرفتاریوں کے لیے ایس آئی یو سے مربوط روابط کے لیے اقدامات کیے جائیں، انھوں نے ایس ایس پی ایس آئی یو کو ہدایات دیں کہ بھتہ کلیکشن ، بھتہ پرچیوں کی تقسیم اور شہریوں کو ہراساں کرنے والے جرائم پیشہ عنصر اور ان کے گروہوں کی بیخ کنی کے لیے بلاامتیاز کارروائیاں کی جائے ، انھوں نے کہا کہ پرائیویٹ اسکولز مینجمنٹ ایسوسی ایشن کے نمائندگان سے ہر ماہ اجلاس کے اقدامات کیے جائیں تاکہ انھیں درپیش مسائل و شکایات کا فوری ازالہ کیا جاسکے۔