آئی سی سی کو ’’کماؤ پوت‘‘ کی قربانی کا چیلنج درپیش

نہ چاہتے ہوئے بھی ٹی20 ورلڈ کپ کے التوا کا مشکل فیصلہ آج سنائے جانے کا امکان

Sports Desk July 20, 2020

بھارتی بورڈکی ’من پسند‘ اعلان سننے کیلیے بے تابی عروج پر پہنچ گئی۔ فوٹو:فائل

آئی سی سی کو ''کماؤپوت'' کی قربانی کا چیلنج درپیش ہے جب کہ نہ چاہتے ہوئے بھی ٹی 20 ورلڈ کپ کے التوا کا مشکل فیصلہ پیر کو سنائے جانے کا امکان ہے۔

انٹرنیشنل کرکٹ کونسل بورڈ کا ایک اور اہم اجلاس ٹیلی کانفرنس کی صورت میں پیر کو ہورہا ہے، جس میں رواں برس آسٹریلیا میں 18 اکتوبر سے 15 نومبر تک شیڈول ٹی 20 ورلڈ کپ کی قسمت کا فیصلہ سامنے آئے گا، یہ میگا ایونٹ آئی سی سی کیلیے کسی کماؤ پوت سے کم نہیں جس کو قربانی سے بچانے کیلیے آئی سی سی گذشتہ 2 ماہ سے تاریخ پر تاریخ دے رہی تھی تاہم اب امکان ہے کہ پیر کی میٹنگ میں التوا کا فیصلہ سنا دیا جائے گا۔

میگا ایونٹ کے التوا کا اعلان سننے کی سب سے زیادہ بے تابی بھارتی کرکٹ بورڈ کو ہے جو خالی ہونے والی 'ونڈو' میں اپنی آئی پی ایل سجائے گا۔آسٹریلوی ریاست وکٹوریہ میں حال ہی میں کورنا وائرس کے مزید کیسز سامنے آئے جس کی وجہ سے وہاں پھر سے لاک ڈاؤن کردیا گیا ہے، خود آسٹریلوی بورڈ کی جانب سے مختلف مواقع پر خالی میدانوں میں رواں برس ورلڈ کپ کی میزبانی میں عدم دلچسپی کا اظہار ہوچکا مگر آئی سی سی بھی اپنے اہم ٹورنامنٹ کو ملتوی کرنے سے قبل تمام تر صورتحال کا بغور جائزہ لینے کی خواہاں تھی۔

خود بھارت میں بھی کورونا وائرس کی وجہ سے صورتحال کافی مخدوش اور متاثرین کی تعداد 10 لاکھ سے تجاوز کرچکی ہے،وائرس کی وجہ سے 26 ہزار سے زائد اموات ہوئی ہیں، اس لیے بھارتی کرکٹ بورڈ ورلڈ کپ ملتوی ہوتے ہی اپنی لیگ کے متحدہ عرب امارات میں انعقاد کی تیاریاں شروع کرنے ارادہ رکھتا ہے۔

بی سی سی آئی کی ایپکس کونسل کے ایک ممبر نے کہا کہ آئی پی ایل کا راستہ صاف کرنے کا پہلا قدم ایشیا کپ کا التوا تھا جو ہوچکا، اب ہمیں آئی سی سی کے اعلان کا انتظار ہے جس کے بعد اپنے پلان پر آگے بڑھیں گے، کرکٹ آسٹریلیا پہلے ہی ٹورنامنٹ کی میزبانی میں عدم دلچسپی ظاہر کرچکا مگر پھر بھی آئی سی سی نے فیصلے کو روکا ہوا ہے۔

دوسری جانب کونسل کے معاملات سے آگاہی رکھنے والے ذرائع کا کہنا ہے کہ پاکستان کو2009 میں چیمپئنز ٹرافی کی میزبانی کرنا تھی مگر اسی سال کے آغاز پر وہاں سری لنکن ٹیم پر حملہ ہوگیا، سب کو معلوم تھا کہ اب پی سی بی اس ایونٹ کی میزبانی نہیں کرپائے گا، اس کے باوجود آئی سی سی نے وہاں کی سیکیورٹی صورتحال کے تجزیے کیلیے کئی ماہ تک ماہرین بھیجے،اس دوران جنوبی افریقہ میں بھی ایونٹ کے انعقاد کی تیاریاں شروع ہوچکی تھیں۔

سب کو اس بارے میں معلوم تھا اس کے باوجود آئی سی سی نے پوری تسلی کرنے کے بعد ہی ٹورنامنٹ پاکستان سے جنوبی افریقہ منتقل کرنے کا رسمی اعلان کیا تھا، اسی طرح ٹی 20 ورلڈ کپ کو بھی فوری طور پر ملتوی نہیں کیا جاسکتا تھا،آسٹریلوی حکومت کی جانب سے ٹورنامنٹ کے اپنے وقت پر انعقاد کی خواہش کا اظہار کیا گیا تھا۔

ادھر آئی سی سی بورڈ کے ایجنڈے میں نئے چیئرمین کے انتخاب کا عمل شروع کیے جانے کا بھی امکان ہے، اس پوزیشن کیلیے انگلینڈ اینڈ ویلز کرکٹ بورڈ کے کولن گریوس مضبوط امیدوار ہیں، ساروگنگولی کے الیکشن میں حصہ لینے کا ارادہ سپریم کورٹ کے کولنگ آف پیریڈ سے متعلق فیصلے سے مشروط ہے۔

27 جون کو سابق کپتان بورڈ کے اسٹیٹ اور نیشنل یونٹ میں کام کرنے کے 6 سال مکمل کر لیں گے، نئے آئین کے تحت اتنے عرصے کے بعد آفیشل کو نئی ذمہ داری سنبھالنے سے قبل 3 برس کا وقفہ لینا ضروری ہے، اگر سپریم کورٹ انھیں بطور بی سی سی آئی صدر مزید کام کرنے سے روکتی ہے تو پھر بورڈ انھیں آئی سی سی کا چیئرمین بنوانے کی کوشش کرے گا۔