مطافِ کعبہ میں تنہا عبادت کرنے والی دنیا کی خوش قسمت خاتون

تصویر میں خاتون کے آس پاس کوئی دوسرا فرد نظر نہیں آرہا ہے

ویب ڈیسک August 03, 2020

عام حالات میں ایسا ممکن نہیں کہ ایک خاتون تنہا کعبہ کے سامنے اکیلی عبادت میں مصروف عمل ہو: فوٹو: العریبیہ

حج کے دوران ایسی تصویرمنظرعام پرآئی جس میں مطافِ کعبہ میں تنہا خاتون عبادت میں مصروف عمل ہے جو کسی معجزے سے کم نہیں۔

کورونا وبا کے باعث رواں سال علامتی حج کیا گیا اوراس دوران دلچسپ و منفرد مناظرعکس بند ہوئے جوعام حج میں نا ممکن ہوتے ہیں جہاں ہرجگہ ایک جم غفیرنظرآتا ہے۔

کچھ ایسی تصاویر بھی سامنے آئیں جنہیں دیکھ کرہرمسلمان کے دل میں چاہ پیدا ہوئی اس کوبھی یہ پرسکون لمحات نصیب ہوں۔ اسی طرح حج کے دوران لی گئی ایک ایسی تصویر وائرل ہورہی ہے جس میں ایک خاتون کو دنیا کی خوش قسمت ترین خاتون قرار دیا جارہا ہے۔

تصویرمیں دیکھا جاسکتا ہے کہ خاتون خانہ کعبہ کے سامنے اکیلی عبادت میں مصروف ہیں اوراس وقت ان کے سوا مطافِ کعبہ میں کوئی دوسرا شخص دکھائی نہیں دے رہا۔ ایسے منفرد لمحات حضرت آدم علیہ السلام کے روئے زمین پرآنے کے بعد شاذونادر ہی رونما ہوئے ہیں کہ کسی مومن نے تنہا کعبہ کا طواف کیا ہو۔

واضح رہے کہ رواں سال کورونا وبا کے باعث علامتی حج کیا گیا اوراس دوران حجاج کرام میں کورونا کا کوئی مریض سامنے نہیں آیا۔