گوجرانوالہ میں پسند کی شادی کیلئے گھر چھوڑنے والی لڑکی کو لڑکا اوراس کا باپ زیادتی کا نشانہ بناتا رہا

وقاص کے ساتھ بھاگ کر تو آگئی لیکن اس نے مجھ سے شادی نہیں کی اورایک علیحدہ گھر میں 6 ماہ تک قید رکھا،متاثرہ لڑکی

ویب ڈیسک December 12, 2013

پولیس نے لڑکی کی درخواست پر جنسی زیادی کا نشانہ بنانے والے لڑکے اور اس کے باپ کو گرفتار کرلیا۔ فوٹو: فائل

پسند کی شادی کرنے کے لئے اپنے خاندان کی عزت تار تار کرنے والی لڑکیوں کے ساتھ کیا ہوتا ہے اس کی ایک مثال پہلوانوں کے شہر گوجرانوالہ میں سامنے آئی جہاں اپنا گھر بار چھوڑنے والی لڑکی کو لڑکا اور اس کا باپ زیادتی کا نشانہ بناتے رہے۔

ایکسپریس نیوز کے مطابق گوجرانوالہ کے تھانہ گرجاکھ کےعلاقے میں نوجوان وقاص محلہ چاہ باغوالہ کی رہائشی حنا کو شادی کا جھانسہ دے کر بھگا کر ساتھ لایا، متاثرہ لڑکی کسی طرح ان درندوں کے چنگل سے نکل کرتھانے پہنچ گئی جہاں اس کا کہنا تھا میں وقاص کے ساتھ بھاگ کر اس کے ساتھ تو آگئی لیکن اس نے مجھ سے شادی نہیں کی اورایک علیحدہ گھر میں 6 ماہ تک قید رکھا جہاں وقاص اور اس کا 50 سالہ باپ طفیل مجھے مسلسل زیادتی کا نشانہ بناتے رہے، پولیس نے لڑکی کی درخواست پر دونوں ملزموں کو گرفتار کرلیا ہے۔

واضح رہے کہ والدین کی جانب سے پسند کی شادی سے انکار کے بعد اکثر لڑکے اور لڑکیاں گھر سے بھاگ کر شادی کرلیتے ہیں جس کے باعث لڑکیوں کی جانب سے اس اقدام کے بعد انہیں سسرالیوں کی جانب سے طعنے بھی برداشت کرنا پڑتے ہیں جب کہ غیرت کے نام پر اہل خانہ کی جانب سے جان سے مارنے کی دھمکیاں بھی دی جاتی ہیں۔