سونم کپور ارباز خان کی فلم ’’ڈولی کی ڈولی‘‘ میں مرکزی کردار ادا کریں گی

اداکارہ کی فلم خوبصورت کی شوٹنگز بھی بیکانیر میں جاری، سونم 1980 میں اداکیے گئے میرے کردار کے لیے بہترین انتخاب ہے، لیجنڈ اداکارہ ریکھا فوٹو : فائل

---

فلم رانجھنا سے شہرت حاصل کرنے والی اداکارہ سونم کپور ان دنوں کامیابی کی بلندیوں پر ہے اور اسے کئی باصلاحیت فلمسازوں اور فنکاروں کے ساتھ کام کرنے کا موقع مل رہا ہے۔

اطلاعات کے مطابق اسے ارباز خان کی پروڈکشن میں بنائی جانے والی فلم ''ڈولی کی ڈولی'' "Dolly Ki Doli" میں مرکزی کردار کے لیے کاسٹ کرلیا گیا ہے۔ اداکارہ کے لیے بالی ووڈ کے کسی خان کے ساتھ کام کرنے کا یہ پہلا موقع ہوگا۔ فلم ''ڈولی کی ڈولی'' ایک چلاک عورت کے گرد گھومتی ہے اور سونم اس میں شمالی بھارت کی لڑکی ''ڈولی'' کا کردار ادا کریں گی جب کہ سونم کے ساتھ مرکزی کردار کرنے کے لیے تین مرد اداکاروں کو فائنل نہیں کیا گیا۔ ارباز جو اپنی اس نئی فلم کے سلسلہ میں بہت پرجوش ہیں کا کہنا ہے کہ ہمیں اس فلم کے لیے ایسی لڑکی کی تلاش تھی جو کردار کے ساتھ پوری طرح انصاف کرسکے اور سونم ہی واحد اداکارہ ہے جو اپنے اس کردار کے ساتھ انصاف کرسکتی ہے۔

میں اسے کاسٹ کرکے بہت خوش ہوں۔ ان کا کہنا تھا جب سونم کو فلم کا اسکرپٹ سنایا گیا تو اس نے فوری طور پر فلم میں ڈولی کا کردار ادا کرنے پر رضامندی ظاہر کردی۔ ارباز خان ایک سوال کے جواب میں کہا کہ کا کہنا تھا کہ فلم میں الفاظ کے ہیر پھیر کے ساتھ ساتھ مزاح کا بھی بہت بڑا حصہ ہوگا اور یہ سونم کپور کی شخصیت کا ایک پہلو ہے جس کا آج تک جائزہ نہیں لیا گیا تھا۔ ان کا کہنا تھا کہ حالات موافق اور سب کچھ ٹھیک چلتا رہا تو اس فلم کو اگلے سال کے آخر میں سینما گھروں کی زینت بنا دیا جائے گا۔ اطلاعات کے مطابق فلم ڈولی کی ڈولی کی ہدایات ابھشیک دونگرا دیںگے اور اس کی شوٹنگ آئندہ برس جنوری میں شروع ہوگی جب کہ اسے 2014 کے آخر میں سینما گھروں کی زینت بنایا جائے گا۔



ادھر سونم کپور جو اپنی بہن ریحا کپور کی فلم خوبصورت جو 1980 میں ہریشکیش مکھرجی کی ہدیتکاری میں بننے والی سپر ہٹ فلم کا ریمیک ہے میں مرکزی کردار ادا کررہی ہیں اس فلم میں سونم کا کردار وہی ہے جو لیجنڈ اداکارہ ریکھا کرچکی ہیں۔ سونم ریمیک میں لیجنڈ اداکارہ کا ادا کیا گیا کردار کرنے پر بہت خوش ہے اور گزشتہ دونوں اداکارہ نے ریکھا سے اس سلسلہ میں ملاقات بھی کی اور ان سے اس کردار کو بہتر طریقے سے کرنے کے لیے ٹپس بھی حاصل کیں ۔بھارتی میڈیا کے مطابق ان دنوں فلم کی شوٹنگز بیکانیر میں کی جارہی ہیں جہاں سونم کپور ایک تقریب کے دوران لیجنڈ اداکارہ ریکھا سے مل کر بہت خوش ہوئی اس موقع پر سینئر اداکارہ نے کہا کہ میرے مطابق سونم میرے کیے جانے والے کردار کو دوبارہ ادا کرنے کے لیے بہترین انتخاب ہے۔

اس موقع پر ریکھا نے ریحا کپور کی پروڈکشن میں اپنی فلم کے ریمیک پر پسندیگی کا اظہار کیا۔ اس موقع پر لیجنڈ اداکارہ ریکھا کی زبان سے اپنی تعریف سن کر خوشی سے اس کی انکھوں میں آنسو آگئے۔ واضح رہے کہ ریکھا نے 1980 کی خوبصورت میں کالج کی تعلیم سے حال ہی میں فارغ ہونے والی لڑکی منجودیال کا کردار ادا کیا تھا جب کہ ریمیک میں سونم انڈین پریمئیر لیگ کی ایک ٹیم کے ساتھ بطور فزیوتھراپسٹ کام کررہی ہے اور اس فلم کی ہدایات شاسنک گھوش دے رہے ہیں۔

واضح رہے کہ معروف اداکار انیل کپور کی بیٹی سونم کپور 9 جون 1985 کو ممبئی میں پیدا ہوئیں۔ سونم نے 2007 میں فلمساز و ہدایتکار سنجے لیلا کی فلم ''سانوریا'' سے بالی ووڈ میں انٹری دی یہ فلم باکس آفس پر خاطر خواہ کامیابی حاصل تو نہ کرسکی مگر اس میں سونم کی کارکردگی کو ناقدین کی جانب سے بے حد پذیرائی حاصل ہوئی تھی۔