یمن میں ہلاکت خیز بارشوں سے عالمی ورثے کی حامل تاریخی عمارت بھی تباہ

عمارتوں کی ازسر نو تعمیر اور تزئین و آرائش جنگی صورت حال کی وجہ سے معطل ہے، فوٹو : ای پی اے

---

یمن میں جولائی سے جاری بارشوں کے سلسلے اور سیلاب کے باعث 130 افراد ہلاک اور سیکڑوں زخمی ہوئے جب کہ دارالحکومت کی تاریخی حیثیت کی حامل عمارت بھی تباہ ہوگئی۔

عالمی خبر رساں ادارے کے مطابق یمن میں گزشتہ ماہ کے وسط سے جاری بارشوں کے سلسلے کے باعث مرکزی ڈیم ٹوٹ گیا اور سیلابی ریلا شہری علاقوں میں داخل ہونے سے کئی رقبہ علاقہ پانی میں ڈوب گیا تھا۔



جولائی کے وسط سے ہونے والی بارشوں اور سیلاب کے دوران مختلف واقعات میں ہلاک ہونے والوں کی تعداد 130 ہوگئی ہیں جب کہ سیکڑوں افراد زخمی ہوئے اور ہزاروں لوگ بے گھر ہوگئے۔



سیلابی ریلا دارالحکومت صنعا میں داخل ہوا جس سے یونیسکو کی جانب سے عالمی ورثہ قرار دی جانے والی تاریخی عمارت کو بری طرح نقصان پہنچا ہے۔ اس علاقے میں 11 ویں صدی میں سفید اور کتھی پتھروں سے تعمیر کی گئی عمارتیں موجود ہیں۔



ان عمارتوں کو پہلے ہی عرب اتحادی فوج اور حوثی باغیوں کے درمیان 6 سال سے جاری جنگ میں نقصان پہنچنے کا خدشہ تھا تاہم میزائلوں سے محفوظ رہ جانے والی ان عمارتوں کو حالیہ بارشوں نے تباہ کردیا۔