ملکی ترقی کیلیے تعلیمی نظام کو مضبوط کرنا ضروری ہے ممنون حسین

تعلیمی میدان میں آئی بی اے کی خدمات قابل ستائش ہیں،المنائی کے عشائیے سے خطاب

Staff Reporter December 14, 2013

کراچی: ماہنامہ عصمت کی 105ویں سالگرہ کے موقع پر صدر ممنون حسین کو یادگاری شیلڈ پیش کی جارہی ہے۔ فوٹو: آئی این پی

صدر ممنون حسین نے کہا ہے کہ ملک کی ترقی کے لیے ضروری ہے کہ ہم اپنے تعلیمی نظام اور اداروں کومضبوط کریں،اس کے لیے حکومت کے ساتھ نجی شعبے کو بھی بھرپور تعاون کرنا ہوگا۔

وہ جمعہ کی شب گورنر ہاؤس میں انسٹی ٹیوٹ آف بزنس ایڈمنسٹریشن ( المنائی) کی جانب سے منعقدہ عشائیہ سے خطاب کررہے تھے۔صدر مملکت نے کہا کہ جس ملک کا تعلیمی نظام کمزور ہوگاوہ ملک کبھی ترقی نہیں کرسکتا ہے، موجودہ حکومت ملک کے تعلیمی نظام کومربوط بنانے کیلیے بھرپور اقدامات کررہی ہے، ہمیں اپنے موجودہ تعلیمی اداروں کے نظام کو بھی دوبارہ مربوط بنانا ہوگا اور تحقیق اور ٹیکنالوجی کے حصول کے لیے خصوصی توجہ دینا ہوگی۔

صدر مملکت نے تعلیمی میدان میں آئی بی اے کی خدمات کو سراہا اور کہا کہ آئی بی اے سے بڑے نامور طالب علم فارغ التحصیل ہوئے ہیں ،جنھوں نے معاشی میدان میں اپنی صلاحیتوں کا لوہا منوایا ہے۔صدر مملکت نے کہا کہ پاکستان قدرتی وسائل سے مالا مال ہے ،ہمیں اپنے وسائل پرانحصار کرکے مسائل کوختم کرنا ہوگا۔ تقریب سے آئی بی اے کے ڈین ڈاکٹرعشرت حسین نے بھی خطاب کیا۔