سلمان خان نمبرون اسٹارجبکہ شاہ رخ دلفریب شخصیت کے مالک ہیں عامرخان

بالی ووڈ کے مسٹر پروفیکٹ عامر خان کا کہنا ہے کہ سلمان خان بالی ووڈ کے حقیقی نمبر ون اسٹار اور شاہ رخ نہایت دلفریب شخصیت کے مالک ہیں۔

برطانوی نشریاتی ادارے کو دیئے گئے ایک انٹرویو کے دوران مسٹر پرفیکٹ کا کہنا تھا کہ ان کے دل میں سلمان خان کے لئے ہمیشہ پیار رہتا ہے۔ انہیں یہ بات کہنے میں کوئی عار نہیں کہ وہی نمبر ون اسٹار اور بالی ووڈ میں مجھ سے زیادہ مقبول ہے کیونکہ سلمان خان میں اکیلے ہی کسی بھی فلم کو کامیاب کرنے کی وہ صلاحیت ہے جو ان میں نہیں۔


عامر خان کا کہنا تھاکہ شاہ رخ خان بھی ایک بہترین اداکار اور دلفریب شخصیت کے مالک ہیں، انہیں شاہ رخ کو اسکرین پر دیکھنا بہت اچھا لگتا ہے اور جب بھی وہ انہیں دیکھتے ہیں ان کے چہرے پر مسکراہٹ آجاتی ہے۔ انہوں نے کہاکہ انہیں شاہ رخ کی فلم "دل والے دلہنیا لے جائیں گے" اور "کچھ کچھ ہوتاہے" بہت پسند ہے۔

واضح رہے کہ سلو میاں اور مسٹر پرفیکٹ ایک دوسرے کے نہایت قریب سمجھے جاتے ہیں اور اکثر دونوں ستارے ایک دوسرے کی تعریفیں کرتے نظر آتے ہیں جب کہ گزشتہ روز عامر خان، کنگ خان کو سپرہٹ فلم دھوم کے چوتھے سیکیوئل کے لئے بہترین انتخاب قرار دے چکے ہیں۔