فیصل آباد کی رہائشی خاتون کی لاش کراچی کے ہوٹل سے برآمد

متوفیہ کی شناخت 40 سالہ شبانہ زوجہ ناصر لطیف کے نام سے کی گئی ہے

ویب ڈیسک August 25, 2020

آج صبح خاتون کی لاش پوسٹ مارٹم کے لیے جناح اسپتال لائی گئی فوٹوفائل

صدر پاسپورٹ آفس کے قریب ہوٹل کے کمرے سے خاتون کی پھندا لگی لاش برآمد ہوئی ہے متوفیہ فیصل آباد کی رہائشی تھی جو ایک روز قبل کراچی آئی تھی۔

تفصیلات کے مطابق کراچی میں پریڈی کے علاقے صدر پاسپورٹ آفس کے قریب صدام ہوٹل کے کمرہ نمبر204 سے پیر اور منگل کی درمیانی شب ایک خاتون کی لاش ملی ، اطلاع ملنے پر پولیس موقع پر پہنچ گئی اور ابتدائی تحقیقات کے بعد لاش کو ایدھی ایمبولینس کے ذریعے سول اسپتال منتقل کیا تاہم رات میں لیـڈی ایم ایل کی عدم دستیابی کے باعث لاش ایدھی سردخانے سہراب گوٹھ منتقل کر دی گئی۔

آج صبح لاش پوسٹ مارٹم کے لیے جناح اسپتال لائی گئی ، پریڈی تھانے کے ڈیوٹی آفیسر محمد طفیل نے بتایا کہ متوفیہ کی شناخت 40 سالہ شبانہ زوجہ ناصر لطیف کے نام سے کی گئی ، متوفیہ کے شناختی کارڈ کے مطابق وہ فیصل آباد کی رہائشی تھی۔

ہوٹل ریکارڈ کے مطابق شبانہ 23اگست کو فیصل آباد سے ایک اور خاتون کے ساتھ کراچی آئی تھی دوسری خاتون کے پاس شناختی کارڈ نہ ہونے کے باعث ہوٹل انتظامیہ نے کمرہ دینے اور وہاں رکنے سے منع کر دیا تھا جس کے بعد وہ خاتون اپنے رشتے داروں کے ہاں اورنگی ٹاؤن چلی گئی تھی۔

ہوٹل انتظامیہ کی جانب سے اطلاع ملنے پر جب پولیس ہوٹل پہنچی تو کمرے کا دروازہ اندر سے بند تھا ، پولیس کنڈی توڑ کر اندر داخل ہوئی تو خاتون کی پھندا لگی لاش لٹک رہی تھی۔ واقعے کی اطلاع متوفیہ کے شوہر کو فیصل آباد فون کر کے دے دی گئی ہے۔ پوسٹ مارٹم کی رپورٹ، متوفیہ کے شوہر اور دوسری خاتون کے آنے بعد مزید تحقیقات سے تفتیش کا دائرہ آگے بڑھے گا۔