ٹیم منیجمنٹ نے انگلینڈ کیخلاف سیریز میں کھلاڑیوں کی بھرپور حوصلہ افزائی کی شان مسعود

انگلینڈ میں مشکل حالات کے باوجود ہماری میزبانی میں کوئی کمی نہیں چھوڑی گئی، شان مسعود فوٹو: فائل

---

قومی ٹیسٹ ٹیم کے اوپنر شان مسعود کا کہنا ہے کہ مصباح الحق کی سربراہی میں لیجنڈری کھلاڑیوں پر مشتمل ٹیم منیجمنٹ نے انگلینڈ کے خلاف ٹیسٹ سیریز کے دوران کھلاڑیوں کی کمزوریوں کو دور کرنے کے ساتھ ساتھ ان کی بھرپور حوصلہ افزائی کی۔

پاکستان اور انگلینڈ کے مابین ٹیسٹ سیریز کے اختتام پر قومی کرکٹ ٹیم کے اوپنر شان مسعود نے انگلینڈ کے آل راؤنڈر کرس ووکس سے بائیو سیکیور ماحول، سیریز کے دوران کرکٹ کے معیار اور پاکستان میں بین الاقوامی ٹیسٹ کرکٹ کی واپسی پر گفتگو کی ہے۔

پاکستان کی مضبوط ٹیم منیجمنٹ سے متعلق کرس ووکس کے سوال کے جواب میں شان مسعود نے کہا کہ مصباح الحق کی سربراہی میں لیجنڈری کھلاڑیوں پر مشتمل ٹیم منیجمنٹ نے ٹیسٹ سیریز کے دوران کھلاڑیوں کی کمزوریوں کو دور کرنے کے ساتھ ساتھ ان کی بھرپور حوصلہ افزائی کی، جو مفید ثابت ہوئی۔ یونس خان کے ساتھ ان کی دوستی دیرینہ ہے اور بطور بیٹنگ کنسلٹنٹ ان کی موجودگی میں سیریز کے پہلے ٹیسٹ کی پہلی اننگز میں سنچری اسکور کرنا ان کے لیے ایک یادگار لمحہ تھا۔

شان مسعود نے کہا کہ وقار یونس نے نوجوان پیسرز شاہین شاہ آفریدی اور نسیم شاہ کے ساتھ بہت کام کیا ہے یہاں تک کہ قومی کرکٹ ٹیم کے باؤلنگ کوچ نے نیٹ میں ان کی باؤلنگ پر بھی بہت محنت کی جس کا نتیجہ یہ ہوا کہ ساؤتھ ہمپٹن ٹیسٹ کے ایک موقع پر ان سے بھی باؤلنگ کروائی گئی۔

شان مسعود نے کہا کہ اسی طرح مشتاق احمد کا انگلش ٹیم کے ساتھ تجربہ بھی قومی ٹیسٹ ٹیم کے لیے مفید ثابت ہوا۔ بائیو سیکیور ماحول ایک نیا تجربہ تھا، جہاں موجود بہترین سہولیات میں تمام کرکٹرز بھرپور محنت کرتے نظر آئے۔ دورہ انگلینڈ کا آغاز ڈربی سے ہوا، جہاں ان مشکل حالات کے باوجود ہماری میزبانی میں کوئی کمی نہیں چھوڑی گئی۔