وسیم اکرم کا اہلیان کراچی کیلیے اہم پیغام

عام دنوں میں پانی کوترسنے والا شہر کراچی اب پانی میں ڈوبا ہوا ہے، وسیم اکرم

---

سوئنگ کے سلطان وسیم اکرم نے بارشوں کے باعث مسائل سے پریشان اہلیان کراچی کے لیے اہم پیغام دیا ہے۔

قومی ٹیم کے سابق کپتان وسیم اکرم نے اپنی اہلیہ شنیرا اکرم کے ہمراہ مانچسٹر سے ایک ویڈیو بیان ریکارڈ کروایا جس میں انہوں نے بارشوں کی وجہ سے مشکلات کا شکار اہلیان کراچی سے ہمدردی کا اظہار کیا۔

اپنے ویڈیو بیان میں سوئنگ کے سلطان کا کہنا تھا کہ میں اہلیان کراچی سے ہمدردی کرتے ہوئے ان کی سلامتی کے لیے دعا گو ہوں، انگلینڈ میں بیٹھ کر جو تصاویر اور ویڈیوز ہم دیکھ رہے ہیں وہ بہت ہی افسوسناک ہیں اور یہ سب دیکھ کر ہم بہت پریشان بھی ہیں، لہذا ہم اہلیان کراچی سے درخواست کرتے ہیں کہ وہ گھروں میں محفوظ رہیں اور کسی ضرورت کے بغیر گھروں سے باہر نہ نکلیں۔

Sending love to Karachi #StaySafeKarachi #KarachiSinks #KarachiUnderWater pic.twitter.com/Rm4M9szFna

— Wasim Akram (@wasimakramlive) August 27, 2020

وسیم اکرم کی اہلیہ شنیرا اکرم نے بھی عوام سے اپیل کی کہ وہ گھروں سے نہ نکلیں اور اپنے دوستوں یا پھر کسی دیگر محفوظ مقام پر پناہ لیں۔

بعد ازاں گزشتہ روز میچ ختم ہونے کے بعد بھی وسیم اکرم نے کراچی کے عوام کے لیے اپنے پیغام میں کہا کہ عام دنوں میں پانی کوترسنے والا شہر کراچی اب پانی میں ڈوبا ہوا ہے، میں اپنی اور پاکستان کرکٹ ٹیم کی جانب سے اہلیان کراچی سے ہمدردی کرتے ہوئے ان کی سلامتی کے لیے دعا گو ہوں۔