دادو میں سیلاب نے تباہی مچادی وبائی امراض سے متعدد بچے جاں بحق

سیلابی پانی سے سیکڑوں گاؤں متاثر اور مکانات منہدم ہونے سے ہزاروں افراد بے گھر

---

سندھ کے ضلع دادو کے تحصیل جوہی کی گاج ندی میں سیلابی پانی کی تباہ کاریاں جاری ہیں اور وبائی امراض سے 5 بچے جاں بحق ہوگئے جبکہ سیلاب متاثرین کھلے آسمان تلے بے یار و مددگار پڑے ہیں۔

جوہی اور کاچھو میں حالیہ بارشوں کے باعث سیلابی پانی سے سیکڑوں گاؤں متاثر اور مکانات منہدم ہونے سے ہزاروں افراد بے گھر ہوگئے جبکہ کروڑوں روپے کا مالی نقصان ہوا ہے۔ زمینی رابطہ منقطع ہونے سے صورتحال سنگین ہوگئی ہے جبکہ خوراک کا بحران بھی پیدا ہوگیا ہے۔

شدید بارشوں اور کیرتھر پہاڑ میں سے آنی والی نہروں کی وجہ سے ہمارے شھر واہی پاندھی اور اس کے آس پاس والے علاقوں میں سیلاب آ چکا ہے کافی کچے گھر گر چکے ہیں کافی مالی نقصان ہوا ہے۔ پورا کاچھو اس وقت پانی کی لپیٹ میں ہے، میری سب سے یہی گذارش ہے کہ اس کو ری ٹویٹ کریں۔ pic.twitter.com/ZOE0mFLrIt

— Ashfaque Amir (@AshfaqueAmir2) August 27, 2020

ضلعی انتظامیہ اور دادو کے اسمبلی ممبران عوام کی مشکلات کے حل میں دلچسپی لیتے نظر نہیں آتے جن کی نااہلی کے باعث امدادی راشن، صاف پانی، ٹینٹ اور طبی سہولیات کی عدم فراہمی ہے۔ سیلاب متاثرین بھوک اور بیماریوں کا سامنا کررہے ہیں اور مسلسل 26 روز سے کھلے آسمان تلے محصور ہیں۔

سیلابی پانی استعمال کرنے سے لوگوں میں ڈائریا اور دیگر وبائی امراض پھوٹ پڑے۔ کاچھو کے مرکزی شہر واہی پاندھی میں 5 بچے پیٹ کی بیماریوں سے دم توڑ چکے ہیں۔

متاثرین نے ضلعی انتظامیہ اور پی پی کے مقامی قیامت پر امدادی سامان کی بندر بانٹ کا الزام لگاتے ہوئے راشن اور ٹینٹ کی جیالوں میں تقسیم کے خلاف احتجاج کیا۔

https://twitter.com/i/status/1299100286741549056

ادھر وزیراعلی سندھ مرادعلی شاہ نے پران ندی اور ایم ایم ڈی نالے کا معائنہ کرتے ہوئے کہا کہ سندھ میں زیادہ بارشوں کے باعث نکاسی آب کے نالوں میں طغیانی اور علاقے میں سیلابی صورت حال پیدا ہوئی، صورت حال بہتر ہونے کے بعد محکمہ آب پاشی کے حکام کے ساتھ مل کر نکاسی آب کے نالوں کی توسیع ہوگی اور اس مسئلے کا مستقل حل نکالیں گے۔