حکومت کی ایک بار پھر سبکی چیرمین نادرا کے بعد چیرمین پیمرا بھی بحال

عدالت نے سیکرٹری اطلاعات اور قائم مقام چیرمین پیمرا کونوٹس جاری کرکے عبدالرشید کو عہدے سے ہٹانے کے احکامات طلب کرلئے

ویب ڈیسک December 16, 2013

حکومت نے گزشتہ روز چوہدری عبدالرشید احمد کا تقررغیرقانونی قرار دیتے ہوئے چیئرمین پیمرا کو عہدے سے برطرف کر دیاتھا۔ فوٹو:اے پی پی

اسلام آباد ہائی کورٹ نے چیرمین پیمرا چوہدری عبدالرشید کی برطرفی کے خلاف حکم امتناعی جاری کرتے ہوئے انہیں عہدے پر بحال کردیا۔

چیرمین پیمرا نے حکومت کی جانب سے عہدے سے برطرفی اسلام آباد ہائی کورٹ میں چیلنچ کی تھی جس پر جسٹس ریاض نے برطرفی کے خلاف حکم امتناعی جاری کرتے ہوئے چیرمین پیمرا چوہدری عبدالرشید کو عہدے پر بحال کرکے سیکرٹری اطلاعات اور قائم مقام چیرمین پیمرا کو نوٹس جاری کردیئے اور چیرمین پیمرا کو عہدے سے ہٹانے کے احکامات طلب کرلئے، حکومت نے گزشتہ روز چوہدری عبدالرشید احمد کا تقررغیرقانونی اور سپریم کورٹ کی گائیڈ لائنز کے برخلاف قرار دیتے ہوئے چیرمین پیمرا کو عہدے سے برطرف کر دیا۔

واضح رہے کہ چوہدری عبدالرشید گزشتہ حکومت میں سیکرٹری اطلاعات و نشریات کے عہدے پرکام کر رہے تھے جنہیں سابق صدر آصف زرداری نے 26 جنوری 2013 کو ترقی دے گر چیرمین پیمرا بنادیا تھا۔