ڈکیتی واردات کے دوران مزاحمت پر فائرنگ سے ڈاکٹر زخمی

زخمی ڈاکٹر سریندر سنگھ سندھ سوشل سیکیورٹی اسپتال لانڈھی میں تعینات ہیں، ایس ایچ او نیو ٹاؤن

Sajid Rauf September 13, 2020

فائرنگ کا واقعہ موبائل فون چھینے کی واردات کے دوران مزاحمت پر پیش آیا ہے، پولیس۔ فوٹو:ایکسپریس

سوک سینٹر کے قریب موبائل فون چھینے کی واردات کے دوران مزاحمت پر نامعلوم مسلح ملزمان کی فائرنگ سے سندھ سوشل سیکیورٹی اسپتال لانڈھی کے ڈاکٹر زخمی ہوگئے۔

ایکسپریس نیوز کے مطابق کراچی سوک سینٹرکے عقب میں واقع نعمان آرکیڈ کے قریب موبائل فون چھینے کی واردات کے دوران مزاحمت پر نامعلوم مسلح ملزمان کی فائرنگ سے 55 سالہ ڈاکٹرسرینڈرسنگھ ٹانگ میں گولی لگنے سے زخمی ہوگئے، جنہیں فوری طور پر قریبی نجی اسپتال منتقل کردیا گیا، جہاں ان کی حالت خطرے سے باہربتائی جاتی ہے۔

ایس ایچ او نیو ٹاؤن منظور آرائیں نے ایکسپریس کو بتایا کہ فائرنگ سے زخمی ڈاکٹرسریندر سنگھ سندھ سوشل سیکیورٹی اسپتال لانڈھی میں تعینات ہیں، اپنی اہلیہ کے ہمراہ گاڑی میں سوار تھے اور نعمان آرکیڈ کے قریب گاڑی سے اترنے لگے تو موٹر سائیکل پر سوار 2 مسلح ملزمان نے ان سے اسلحہ کے زور پرموبائل فون چھین لیا، جس پر ڈاکٹر سریندر سنگھ نے مزاحمت کی تو مسلح ملزمان نے فائرنگ کردی اورفرارہوگئے۔ پولیس نے واقعے کی سی سی ٹی وی فوٹیج سمیت دیگر شواہد اکٹھا کرکے واقعے کی تفتیش شروع کردی ہے۔