ضلع وسطی میں مسائل زیادہ ہیں ماڈل علاقہ بنائیں گے وزیر بلدیات

سڑکوں کی تعمیر سے قبل سیوریج کانظام بہتربنایاجائے گا،وزیراعلیٰ نے ایک ارب روپے کافنڈجاری کردیا،ناصرحسین شاہ

Staff Reporter September 28, 2020

سیاست کرنا جماعتوں کاحق ہے لیکن لسانیت اور نفرت نہ پھیلائی جائے،ایک ریلی ہم بھی نکال لیں گے، گفتگو فوٹو: فائل

GENK: وزیربلدیات ناصر حسین شاہ نے کہا ہے کہ کراچی کے ضلع وسطی کوماڈل علاقہ بنائیں گے،ضلع وسطی کے مسائل کی نشاندہی کرلی ہے۔

سڑکوں سے کچراہٹایا جائے گا،سڑکوں کی تعمیر سے قبل سیوریج کا نظام بہتر بنایاجائے گا،سالڈ ویسٹ منجمنٹ کو ضلع وسطی میں فعال کردیا گیا ہے امید ہے جلد بہتری نظر آئیگی،وہ ڈپٹی کمشنرضلع وسطی کے دفتر میں میڈیا سے بات چیت کررہے تھے ،صوبائی وزیرکاکہنا تھاکہ ضلع وسطی سب سے بڑا ضلع ہے سب سے زیادہ مسائل بھی یہاں ہی ہیں،چیئرمین پیپلز پارٹی بلاول بھٹو نے وزیراعلیٰ کوکراچی کے تمام علاقوں کے مسائل حل کرنے کی ہدایت کی ہے جس پر عمل درآمد شروع کردیا گیاہے۔

ضلع وسطی میں سڑکوں اور گلیوں کا بارشوں سے برا حال ہوا،سڑکوں سے پہلے سیوریج کے نظام کو بہتر بنایا جائے گا،بارشوں سے روڈگلیاں علاقے آمدورفت دشوار ہوگئی ہے ،اسٹریٹ لائٹس پارکوں کو بھی بہتر بنایا جائے گا،بلاول بھٹو زرداری کی ہدایت پر وزیر اعلیٰ سندھ نے ضلع وسطی کی بہتری کے لیے ایک ارب روپے کا فنڈفراہم کردیاہے شہری جلد بہت بڑی تبدیلی دیکھیں گے۔

سیاسی جماعتوں کی جانب سے حقوق کراچی کے نام پرنکالی جانے والی ریلیوں کے سوال پرناصرحسین شاہ نے کہاکہ ایک ریلی ہم بھی نکال لیں گے، سیاست کرنا جماعتوں کا حق ہے لیکن لسانیت اور نفرت نہ پھیلائی جائے،شہرکی ترقی کے سفر میں تمام سیاسی جماعتوں اوراسٹیک ہولڈرز کو ساتھ لے کرچلیں گے، ضلع وسطی سمیت شہر بھر میں سرکاری اداروں نے تجاوزات کو سرکاری حیثیت دی اور تجاوزات قائم کرنے کی باضابطہ اجازت دی گئی تاہم اب تمام تجاوزات کاخاتمہ کردیاجائے گا۔