چاہے کچھ بھی ہو مشرف بیرون ملک چلے جائینگے شیخ رشید

لاہور میں جلسہ ہوگا، کسی میں ہمت ہے تو روک لے،سربراہ عوامی مسلم لیگ۔فوٹو:فائل

---

عوامی مسلم لیگ کے سربراہ شیخ رشید نے کہا ہے کہ ہم مہنگائی کیخلاف احتجاج میں پی ٹی آئی کے ساتھ ہیں، اگر کہیں دفعہ 144 ہے تو ہم اس کے 144 ٹکڑے کردیں گے، ہم عوام کے حقوق کا دفاع کررہے ہیں۔

دفعہ144 وہاں لگتی ہے جہاں امن وامان کا مسئلہ ہو، جلسہ ہوگا، ریلی نکلے گی اگر کسی کی ہمت ہے تو روک لے۔ ایکسپریس نیوز کے پروگرام تکرار میں میزبان عمران خان سے گفتگو میں انھوں نے کہا کہ یہ سوداگروں کی حکومت ہے اور سوداگروں کے سامنے عوام کی کوئی اہمیت نہیں ہوتی یہ سمجھتے ہیں کہ ہم نے پانچ سال پورے کرنے کا اشٹامپ پیپر لکھوا لیا ہے، یکم جنوری سے وزیراعظم کی اصل حکومت شروع ہونے والی ہے، اگر یہ ملک کو کچھ آگے لے گئے تو ٹھیک ہے ورنہ حالات کسی بھی سیاسی جماعت کے کنٹرول میں نہیں رہیں گے۔



آج ہم دنیا میں مہنگائی کی فہرست میں پہلی پوزیشن پر آگئے ہیں اور اس کا کریڈ ٹ ن لیگ کی حکومت کو جاتا ہے۔ انھوں نے کہا کہ شریف برادران اسحاق ڈار اور چوہدری نثار سے تنگ ہیں لیکن ان کو ہٹا نہیں سکتے، اسحق ڈار نے جس روز سچ بولا وہ اس کی زندگی کا آخری دن ہوگا، ن لیگ کی کابینہ میں گروپ بن چکے ہیں۔ انھوں نے مزید کہا کہ پرویزمشرف کے کیس میں اقوام متحدہ نے کیا کرلینا ہے، چاہے کچھ بھی ہو اس نے باہر ہی جانا ہے۔