پائیدار ترقی کے لیے نالج اکانومی پر توجہ کی ضرورت

نالج اکانومی کی نمو کیلیے پاکستان انوویشن فنڈ کا قیام عمل میں لایا جائے

Express Tribune Report November 02, 2020

روایتی برآمدات کا حجم بدلتی عالمی صورتحال میں برقرار نہیں رہ سکے گا فوٹو : فائل

وزیراعظم عمران خان نے گذشتہ ہفتے ' نالج سٹی ' کاافتتاح کرتے ہوئے کہا تھا کہ 'قومیں کپاس اور کپڑے بیچنے سے نہیں تعلیم پر خرچ کرنے سے ترقی کرتی ہیں۔

ان کا یہ کہنا بالکل بجا ہے مگر سوال یہ ہے کہ کیا تعلیم پر زیادہ رقم خرچ کرنے اور معاشی فوائد حاصل کرنے کا کوئی منصوبہ موجود ہے ؟ اور اگر ہے بھی تو اس سے فائدہ اٹھانے کے لیے وقت درکار ہوگا۔۔۔کم از کم ایک نسل! چنانچہ توجہ طلب امر یہ ہے کہ جو شے پہلے سے موجود ہے یعنی پاکستانی کے موجودہ علمی اثاثے، انھی سے کیوں نا فائدہ اٹھایا جائے اور اقتصادی فوائد کیوں نا حاصل کیے جائیں۔ اس کے لیے صنعتی شعبے پر توجہ دینے کی ضرورت ہے۔ مگر سب سے اہم مسئلہ اقتصادی پوٹینشل اور پالیسیوں میں ترجیحات کے درمیان ربط ( لنک ) نہ ہونا ہے۔

پاکستان کی جی ڈی پی کا 50 فیصد سے زائد خدمات پر مشتمل ہے مگر حکومتی سپورٹ پروگراموں اور سبسڈیز کی صورت میں اس جانب پالیسی فوکس نہیں ہے۔ ایک اور مسنگ لنک یہ ہے کہ ہماری برآمدات جی ڈی پی کا 10فیصد بھی نہیں ہیں اس کے باوجود 90 فیصد فسکل اور پالیسی رعایتوں ( incentives ) کا رخ برآمداتی شعبے کی جانب ہے۔ گلوبل سپلائی چین کی بدلتی صورتحال کی وجہ سے پاکستان کی روایتی برآمدات طویل مدتی تناظر میں برقرار نہیں رہ سکیں گی چہ جائیکہ ان کے اہداف نمو کے حصول کی توقع رکھی جائے۔

اس تناظر میں ' نالج اکانومی' ٹیکسٹائل کا بہترین متبادل ثابت ہوسکتا ہے۔ نہ صرف درکار محدودوسائل بلکہ ایفشی اینسی، مستعدی اور فراہمی کی آسانی ( آن لائن ڈلیوری) اور خام مال ( انسانی وسائل ) کی بآسانی دستیابی کی وجہ سے بہترین متبادل ثابت ہوسکتی ہے۔ نالج اکانومی دراصل اختراعات اور آئیڈیاز کی کمرشلائزیشن کا نام ہے۔ گوگل، ایپل، نیٹ فلکس اور علی بابا نالج اکانومی کی چند مثالیں ہیں۔

آئی ٹی سیکٹر بھی نالج اکانومی کا حصہ ہے۔ پاکستان میں یہ شعبہ کسی نہ کسی طور نمو پارہا ہے۔ آئی ٹی سیکٹر آئیڈیاز کی پرورش اور عالمی معیار کی مصنوعات کے لیے زرخیز زمین کی حیثیت رکھتا ہے۔ اسے بہترین پلیٹ فارم کے طور پر استعمال کیا جاسکتا ہے۔ تاہم اس شعبے کو بھرپور حکومتی سرپرستی کی ضرورت ہے۔ حکومت کو ملک میں نالج اکانومی کی نمو کے لیے پاکستان انوویشن فنڈ ( پی آئی ایف) کا قیام عمل میں لائے۔