کورونا وائرس کا شکار ہونے والے پاکستانی فنکار

رواں برس متعدد فنکار کورونا وائرس کا شکار ہوئے جن میں سے کچھ صحتیاب ہوگئے اور کچھ ابھی بھی قرنطینہ میں ہیں

ویب ڈیسک November 08, 2020

جب پاکستان میں لاک ڈاؤن کا اعلان کیا گیا تو شوبز فنکاروں نے ایس او پیز پرعمل کرتے ہوئے سماجی رابطہ اختیار کیا فوٹوفائل

رواں برس خطرناک کورونا وائرس کے باعث دنیا بھر کی طرح جب پاکستان میں بھی لاک ڈاؤن کا اعلان کیا گیا تو شوبز فنکاروں نے ایس او پیز پرعمل کرتے ہوئے سماجی رابطہ اختیار کیا اور تقریباً تمام فنکار اپنے اپنے گھروں میں قرنطینہ ہوگئے۔

تاہم ان میں سے کچھ فنکار کام کی وجہ سے ایس او پیز پر سختی سے عمل نہیں کرسکے جس کی وجہ سے کورونا کی زد میں آگئے ۔ یہاں پاکستان شوبز انڈسٹری کے ان فنکاروں کی فہرست پیش کی جارہی ہے جو کورونا وائرس کا شکار ہوئے۔

ندا یاسر اور یاسر نواز

اداکارہ ندا یاسر نے لاک ڈاؤن کے دوران حکومتی ہدایات کے باوجود اپنے مارننگ شو کی شوٹنگ جاری رکھی جس کا نتیجہ یہ ہوا کہ وہ اور ان کے شوہر یاسر حسین مارننگ شو کے عملے سمیت کورونا وائرس کا شکار ہوگئے۔ بعد ازاں ندا اور یاسر نواز نے خود کو گھر میں آئسولیٹ کرلیا لیکن اب دونوں صحت مند ہیں۔

علیزے شاہ اور نعمان سمیع

ندا یاسر کے مارننگ شو میں ڈراما سیریل ''میرا دل میرا دشمن'' کی کاسٹ بطور مہمان شریک ہوئی تھی اس ڈرامے میں علیزے شاہ اور نعمان سمیع مرکزی کردار اداکررہے تھے جب کہ یاسر نواز نے اس ڈرامے کو ڈائریکٹ کیا تھا۔ میڈیا رپورٹس کے مطابق اسی شو کے دوران ندا یاسر، یاسر نواز، علیزے شاہ اور نعمان سمیع کورونا کا شکار ہوئے تھے۔

روبینہ اشرف اور سکینہ سموں

پاکستان ٹی وی کی مایا ناز اور سینئر اداکارائیں روبینہ اشرف اور سکینہ سموں بھی کورونا وائرس کی زد میں آچکی ہیں۔ میڈیا میں دونوں کے خلاف افواہیں گردش کرنے لگی تھیں کہ کورونا کے باعث روبینہ اشرف کی حالت بہت تشویشناک ہے جب کہ سکینہ سموں کی تو کورونا کی وجہ سے موت کی افواہیں سوشل میڈیا پر زیر گردش تھیں لیکن ان دونوں اداکاراؤں نے ان افواہوں کو بے بنیاد قرار دیا تھا۔

ابرارالحق اور واسع چوہدری

معروف پاکستانی گلوکار ابرارالحق بھی کورونا وائرس کا شکار ہوچکے ہیں۔ ناول کورونا کا ٹیسٹ مثبت آنے کے بعد ابرارالحق نے خود کو قرنطینہ کرلیا تھا۔ تاہم وہ مسلسل سوشل میڈیا کے ذریعے لوگوں کو احتیاط برتنے کی ہدایات کررہے تھے۔ اداکار و میزبان واسع چوہدری بھی کورونا وائرس کا شکار ہوچکے ہیں۔ انہوں نے ٹوئٹر پر کورونا وائرس کا ٹیسٹ مثبت آنے کی تصدیق کی تھی جس کے بعد انہوں نے خود کو آئسو لیٹ کرلیا تھا۔

شفاعت علی اور نوید رضا

اسٹینڈ اپ کامیڈین اور میزبان شفاعت علی بھی کورونا وائرس میں مبتلا ہوچکے ہیں۔ انہوں نے خود کو کورونا ہونے کی خبر کی تصدیق کرتے ہوئے کہا تھاکہ ان میں کورونا کی بہت معمولی علامات ظاہر ہوئی ہیں۔ شفاعت علی کے علاوہ ٹی وی اداکار نوید رضابھی اس وائرس کا شکار ہوئے تھے۔ نوید رضا کورونا ٹیسٹ مثبت آنے کے بعد نہ صرف اپنے مداحوں کو اپنی صحت سے مسلسل آگاہ رکھ رہے تھے بلکہ لوگوں کو کورونا وائرس سے متعلق آگاہی بھی دے رہے تھے۔

نوید رضا نے خبردار کرتے ہوئے کہا تھا وہ لوگ جو کورونا وائرس کو سنجیدہ نہیں لے رہے اگر ایسے لوگ اپنے پیاروں سے 2 فیصد بھی محبت کرتے ہیں تو اس وائرس کو سنجیدگی سے لیں. کیونکہ آپ کو نہیں معلوم کہ یہ کتنا درد دیتا ہے۔ آپ کو سانس کی تکلیف ، سینے میں درد، بخار اور نہ ختم ہونے والا سر درد شروع ہوجاتا ہے۔

سلمان احمد

معروف گلوکار اور پی ٹی آئی کے رکن سلمان احمد نے رواں برس اپریل میں ٹوئٹر پر کہا تھا کہ ان میں کورونا وائرس کی علامات ظاہر ہوئی ہیں اور وہ جلد ہی کووڈ 19 کا ٹیسٹ کرائیں گے۔ بعد ازاں انہوں نے کورونا وائرس سے صحت یاب ہونے کی تصدیق بھی کی تھی۔

عثمان مختار اور امیر گیلانی

ڈراما سیریل 'ثبات' کے دونوں مرکزی اداکار عثمان مختارا ور امیرگیلانی نے بھی حال ہی میں کورونا وائرس میں مبتلا ہونے کی خبر مداحوں کے ساتھ شیئر کی۔ ان دونوں نے فی الحال خود کو آئسو لیٹ کیا ہوا ہے۔ اور لوگوں سے دعا کی درخواست کی ہے۔

صحیفہ جبار خٹک اور جواد احمد

حال ہی میں ماڈل صحیفہ جبار خٹک نے بھی ان میں کورونا وائرس ہونے کی تصدیق کی ہے ۔ جب کہ جواد احمد بھی اس مرض کا شکار ہوچکے ہیں۔ انہوں نے اس خبر کی تصدیق کرتے ہوئے کہا کہ کورونا کا ٹیسٹ مثبت آنے کے بعد انہوں نے خود کو گھر کے ایک کمرے تک محدود کرلیا ہے اس کے ساتھ انہوں نے مداحوں سے دعا کی اپیل بھی کی۔

عامر لیاقت حسین اور طوبیٰ عامر

تین روز قبل عامر لیاقت حسین نے سماجی رابطے کی ویب سائٹ ٹوئٹر پر ان میں اور ان کی دوسری اہلیہ میں کورونا وائرس کا ٹیسٹ مثبت آنے کی تصدیق کی۔ تاہم انہوں نے چند گھریلو نسخے بھی بتائے اور کہا کہ یہ نسخے کورونا میں مددگار ثابت ہورہے ہیں۔