خاتون پولیو ورکر کو ہراساں کرنے والا ملزم گرفتار

ملزمان خاتون کو کچھ دنوں سے ہراساں کر رہے تھے، پولیس حکام۔ فوٹو:فائل

---

گلشن معمار میں خاتون پولیو ورکر کو ہراساں کرنے والا ایک ملزم گرفتار ہوگیا۔

ایکسپریس نیوزکے مطابق کراچی کے علاقے گلشن معمار میں خاتون پولیو ورکر کو ہراساں کرنے والا ایک ملزم گرفتار ہوگیا اور اس کے خلاف مقدمہ درج کرکے تفتیش کی جارہی ہے۔

پولیس حکام کے مطابق متاثرہ خاتون نے رپورٹ درج کرائی تھی جس میں اس نے 5 ملزمان کو نامزد کیا ہے، اور بیان دیا ہے کہ ملزمان اسے کچھ دنوں سے ہراساں کر رہے ہیں، نامزد ملزمان میں شان کامریڈ، گل محمد، نادر چانڈیو، علی غلام بھبرو اور عمران سپرو شامل ہیں۔

پولیس نے اطلاع ملتے ہی خاتون کی مدعیت میں مقدمہ درج کر لیا اور فوری کارروائی کرتے ہوئے ایک نامزد ملزم عمران سپرو کو گرفتار کر لیا، جب کہ اس کے دیگر ساتھیوں کی تلاش جاری ہے۔