کورونا کی دوسری لہر راولپنڈی کے مختلف علاقوں میں اسمارٹ لاک ڈاؤن نافذ

شہریوں کی نقل و حرکت محدود کردی گئی، ہاٹ اسپاٹ علاقوں میں تعلیمی ادارے ، شادی ہالز اور تجارتی مراکز بھی بند

ویب ڈیسک November 11, 2020

راولپنڈی کے چار ہاٹ اسپاٹ علاقوں میں لاک ڈاؤن نافذ کردیا گیا ہے۔ (فوٹو، فائل)

کورونا وائر وبا کی دوسری لہر میں شہریوں کی زندگیوں کو محفوظ بنانے کے لیے راولپنڈی کے چار ہاٹ اسپاٹ علاقوں میں اسمارٹ لاک ڈاون نافذ کرکے شہریوں کی نقل و حرکت محدود کردی گئی۔

پنجاب حکومت نے راولپنڈی میں کورونا کی دوسری لہر کے دوران شہریوں کی زندگیوں کو محفوظ بنانے کے لیے چار ہاٹ اسپاٹ علاقوں میں اسمارٹ لگانے کا نوٹیفکیشن گذشتہ روز جاری کیا تھا۔

نوٹیفکیشن کے مطابق سیٹلائٹ ٹاون، عباسی آباد، فوجی فاؤنڈیشن یونیورسٹی نیو لالہ زار اور گورنمنٹ گرلز ہائی سکول کہوٹہ کو سمارٹ لاک ڈاون کے تحت سیل کردیا گیا ہے۔

ہاٹ سپاٹ علاقوں میں کریانہ، آٹا چکی، دودھ دہی، تندور،م پٹرول پمپس اورپھل سبزی کی دکانیں صبح 9بجے سے شام 7 بجے تک کھل سکیں گی، جبکہ میڈیکل سٹورز، پرائیوٹ ہسپتال اور دیگر لیبارٹریاں 24 گھنٹے کام جاری رکھ سکیں گی۔

ہاٹ اسپاٹ علاقوں میں تعلیمی ادارے، شادی ہالز، تجارتی مراکز، ہوٹلز بند رہیں گے۔ ان علاقوں میں مکینوں کو گھروں تک محدود رہنے کی ہدایت کی جائے گی اور ان علاقوں میں باہر سے آنے والوں کو داخلے کی اجازت نہیں ہوگی۔