ایک ہی فلائٹ سے آنیوالے 38 کھیپی گرفتار 6 کروڑ کا سامان ضبط

کھیپئے کسٹمزوایئرپورٹ عملے کی ملی بھگت سے لیپ ٹاپ،ایس ڈی کارڈز، زیورات، آئی فون گرین چینل سے کلیئرکرارہے تھے

Ehtisham Mufti November 15, 2020

ڈپٹی کلکٹرانعام نے کلیئرنس روکی،7ملزمان کیخلاف مقدمات،اسمگلنگ میں ملوث کسٹمزعملہ ڈیوٹی آف،محکمہ جاتی کارروائی شروع۔ فوٹو: فائل

کسٹمز نے کراچی ایئرپورٹ کے جناح ٹرمینل پر ایک ہی فلائٹس سے آنیوالے 38 کھیپیوں کے خلاف کارروائی میں 6 کروڑ روپے کی اسمگل کی جانے والی اشیا برآمد کرلی۔

پاکستان کسٹم پریونٹیو جناح ٹرمینل پر ڈپٹی کلکٹر انعام وزیر کی کامیاب کارروائی میں 38کھیپیوں کے خلاف کارروائی میں 6کروڑ روپے مالیت کی اشیا اسمگل کرنے کی کوشش ناکام بنادی گئی ہے، کسٹمز حکام نے بازیاب مصنوعات ضبط کرکے7 ملزمان کے خلاف مقدمات درج کرلیے ہیں۔

ملزمان میں محمدیاسر،سید کامران حسین، محمداحمدخان، عمران خان،کامران کاشف،جمیل الدین قریشی،شیخ یاسرربانی شامل ہیں، برآمد سامان کی غیرقانونی کلیئرنس میں ملوث کسٹمزافسران اور عملے کے خلاف بھی محکمہ جاتی کارروائی شروع کردی گئی ہے، مذکورہ کارروائی دبئی سے آنے والی ایمریٹس کی فلائٹ نمبر606 کے ذریعے آنے والے 38 مسافروں کے سامان پر شک کی بنیاد پر کی گئی۔

کسٹمز حکام کی جانچ کے دوران مسافروں کے سامان سے لیپ ٹاپ، ایس ایس ڈی کارڈز، مصنوعی زیورات، آئی فون ، یوایس بی،گلاس بیٹس،ایپل واچ، کونٹک لینس، کاسمیٹکس،آئی پیڈ، سام سنگ ٹیبلٹ، الیکٹرانکس اشیا، مالبروگولڈ، سین ڈسک الٹریو ایس بی، مہنگے چاکلیٹ، قیمتی موبائل فونز، مہنگے پرفیومز برآمد ہوئے ہیں، 38کھیپئے سامان کراچی ایئرپورٹ پر تعینات کسٹمز افسران کی ملی بھگت سے گرین چینل کے ذریعے کلیئرکرنے کی کوشش کررہے تھے جنہیں ڈپٹی کلکٹرانعام اللہ وزیر کی بروقت مداخلت پرگرین چینل کے ذریعے کلیئرنس کو روکا گیا۔

ڈپٹی کلکٹرکسٹمزنے بتایاکہ دبئی سے آنے والے 38 مسافروں کے سامان کو غیرقانونی طورپرکلیئر کیا جارہا تھا، کلیئرنس میں ایئرپورٹ پرتعینات افسران وعملہ بھی ساتھ دے رہا تھا انھوں نے بتایاکہ غیرقانونی کلیئرنس میں ملوث کسٹمز افسران وعملے کو ڈیوٹی آف کرکے محکمہ جاتی کارروائی شروع کردی گئی ہے ، کھپیئے گرین چینل کا ناجائز فائدہ اٹھا کر سامان کلیئرکرارہے تھے کسٹم حکام نے38کھیپیوں کے پاسپورٹ بھی قبضے میں لے لیے ہیں۔