’پروین رحمٰن‘ کا قتل اورنگی پروجیکٹ کی زمین پر قبضہ کیلیے کیا گیا جے آئی ٹی رپورٹ

ابتدائی تفتیش کرنیوالے افسران نے کیس خراب کیا،نوکری سے فارغ کیاجائے،ڈائریکٹرایف آئی اے کاوئنٹرٹیررازم

کورٹ رپورٹر December 01, 2020

جن ملزمان کاٹرائل ہورہاہے وہ قتل میں ملوث ہیں،ملزمان پشتون اورافغان آبادی میں خاتون کوبرداشت نہیں کررہے تھے،رپورٹ فوٹو : فائل

ہائی کورٹ نے پروین رحمٰن قتل میں ملزم عمران سواتی و دیگر کی درخواست ضمانت پر ٹرائل کورٹ سے کیس میں پیش رفت رپورٹ طلب کرلی۔

ہائی کورٹ میں پروین رحمن قتل میں ملزم عمران سواتی و دیگر کی درخواست ضمانت کی سماعت ہوئی، کیس میں از سرنوتحقیقات کرنے والی ٹیم نے رپورٹ جمع کرادی۔

جے آئی ٹی رپورٹ ڈائریکٹر ایف آئی اے کاوئنٹر ٹیررازم بابر بخت کی جانب سے تیار کی گئی ہے جس میں کہاگیاکہ ابتدائی تفتیش کرنے والے افسراں نے کیس خراب کیا،بطور سزا انھیں نوکری سے فارغ کیا جائے، ڈی آئی جی جاوید عالم اوڈھواورایس پی آصف اعجازبھی غفلت میں برابرکے شریک ہیں۔

پولیس کے سینئر افسران کے خلاف کارروائی آئی جی سندھ کا صوابدیدی اختیارہے جن ملزمان کا ٹرائل ہورہا ہے وہ قتل میں ملوث ہیں، پروین رحمن کا قتل اورنگی پائلٹ پروجیکٹ کی زمین پر قبضہ کرنے کیلیے کیاگیا، ملزمان پشتون ہیں جبکہ پروجیکٹ کی سربراہ خاتون بہاری تھی ،ملزمان پشتون اورافغان آبادی میں خاتون کو برداشت نہیں کررہے تھے۔

قتل کے پیچھے بااثرافرادکے ملوث ہونے کے شواہد نہیں ملے، پروین رحمنٰ نے اپنی زندگی میں بھی کسی با اثر شخص کا نام نہیں لیا تھا، پروین رحمن نے اپنی زندگی میں رحیم سواتی کا نام لیا تھا جو ان کا پڑوسی تھا، رحیم سواتی بھتہ خور اور لینڈ گریبر ہے جو اورنگی پائلٹ پروجیکٹ کی زمین پر قبضہ کرنا چاہتا تھا، رحیم سواتی کے خلاف بھتہ خوری ،زمینوں پرقبضے کے مقدمات بھی درج کیے جائیں۔

عدالت نے ٹرائل کورٹ سے کیس میں پیش رفت رپورٹ طلب کرتے ہوئے سماعت 2 ہفتوں کے لیے ملتوی کردی۔